Б.ОЮУН-ЭРДЭНЭ

Завхан аймгийн хойд чиглэлийн сумдад өвөлжилт хүндэрч болзошгүй байна. Тухайлбал, Тэс, Баянтэс, Баянхайрхан, Асгат, Түдэвтэй  суманд цас их хэмжээгээр орсон байна. Тиймээс аймгийн Засаг даргын захирамжаар томилогдсон ажлын хэсэг газар дээр нь очиж ажиллалаа. Энэ жил өмнөх жилүүдээс эрт цас орж, цасны зузаан тал газартаа 15-20 см, уулархаг хэсгээрээ 20-40 см байгаа юм. Тиймээс өвөлжилтийн нөхцөл байдал хүндрэх хэмжээнд хүрээд байгааг орон нутгийн удирдлагууд хэллээ. Мөн зарим суманд зам хаагдаад байна. Тэс сумын Нисэг,  Баян-Уул баг, Баянхайрхан сумын Төөнөт, Минж  багт нэлээд их хэмжээний цас орсон байгаа бол Баянтэс сумын Зайгал, Хачиг багуудын малчдад машин техникээр төрийн үйлчилгээг хүргэх боломжгүй болж, ердийн хөсгөөр харилцаа холбоо тогтоож буй аж.  Мөн Тосонцэнгэл, Их уул сумдад ч нөхцөл байдал нэлээд хүндэрсэн байна. Тиймээс дээрх сумдын малчдад дэмжлэг, тусламж үзүүлэх, цаашид нөхцөл байдал илүү хүндэрсэн тохиолдолд авах арга хэмжээний тухай бэлтгэл ажлын төлөвлөгөөг гаргах үүрэг даалгаварыг аймгийн Засаг дарга өглөө.

Цаг агаарын урьдчилсан мэдээгээр арванхоёр болон нэгдүгээр сард олон жилийн дунджаас ахиу хур тунадас орж, хүйтрэх төлөвтэй байгаа юм. Тиймээс аймгийн Онцгой комисс хуралдаж төв суурин газар болон хөдөө орон нутагт авч хэрэгжүүлэх арга хэмжээний төлөвлөгөөг гаргахаар ажиллаж байна. Аймгийн хэмжээнд одоогоор өвөлжилтийн бэлтгэл ажил 80 гаруй хувьтай байгааг албаныхан хэллээ.