Б.ОЮУН-ЭРДЭНЭ

Авлигатай тэмцэх үндэсний хөтөлбөрийг танилцуулах, хяналт тавих талаар ард иргэдэд мэдээлэл өгөх ажлын хэсэг хөдөө орон нутагт ажиллаж байна. Ажлын хэсгийнхэн Улиастай хотод ажиллах үеэрээ төрийн болон төрийн өмчийн оролцоотой байгууллагуудын удирдлагууд, сумдын удирдлагууд, хөрөнгө орлогын мэдүүлэг гаргагч төрийн албан хаагчдад зориулсан сургалтыг зохион байгууллаа. Мөн гэмт хэргээс урьдчилан сэргийлэх ажлыг зохицуулах зөвлөлтэй уулзалт хийснээс гадна “Авлигатай тэмцэхэд хувийн хэвшлийн үүрэг оролцоо” сэдэвт  хэлэлцүүлгийг зохион байгуулсан юм. Сургалтад төрийн байгууллагын дарга болон хөрөнгө орлогын мэдүүлэг гаргагч албан тушаалтнууд, бизнес эрхлэгчид, 24 сумын удирдлагууд, нийтдээ 250 гаруй хүн хамрагджээ.

Завхан аймгийн хувьд авлигаас ангид байх зорилт тавин ажиллаж байгаа бөгөөд энэ хүрээндээ төрийн албан хаагчдад зориулсан шат дараалсан сургалтуудыг зохион байгуулахаар төлөвлөсөн аж. Тиймээс энэ ажлын эхлэл нь Авлигатай тэмцэх газраас зохион байгуулж байгаа энэхүү сургалт гэдгийг аймгийн Засаг дарга Д.Батсайхан онцоллоо. Мөн тэрээр иргэдээ сонсох утас ажиллуулж, мэдээллийг ил тод, нээлттэй болгох тал дээр анхаарч ажиллаж байгаагаа хэллээ.