Т.САЙХАН

Монголын бодибилдинг, фитнессийн холбоо өчигдөр /11.28/ ерөнхийлөгчөө сонгосон болон оролцох гэж буй тэмцээний уралдааныхаа талаар мэдээлэл хийлээ. 2013 оны оноос хойш тус холбоо ерөнхийлөгчгүй байжээ. Тэгвэл саяхан холбооны ерөнхийлөгчөөр "Октобус консалтинг" компанийн гүйцэтгэх захирал Г.Анархүү сонгогдсон байна.  Тэрээр “Холбооны үйл ажиллагааг идэвхжүүлэхийн тулд олон ажил хийхээр төлөвлөж байна. Гол нь тамирчдаа яаж илүү дэмжих вэ гэдэг дээр анхаарна. Бидний хамгийн ойрын тэмцээн ДАШТ байна. Энэ тэмцээнээс олон тамирчид амжилт дүүрэн ирнэ гэдэгт итгэлтэй байгаа. 2017 онд манай холбооны хувьд чухал жил байх болно. Учир нь Монгол Улсад анх удаа бодибилдинг, фитнессийн ДАШТ болох гэж байгаа. Үүнд бид маш сайн бэлтгэл, оролцож, зохион байгуулах үүрэгтэй. Би спортод ойр байсан. Хөлбөмбөгт дуртай. “Улаанбаатарын унаганууд” багт тоглож байсан учраас спортын ялалт, ялагдлын амтыг мэдэрнэ. Өвөө маань Монголын морин спорт, уяачдын холбоонд 18 жил нарийн бичгийн даргаар ажилласан хүн бий. Тиймээс спортын төлөө ажиллахыг би амаргүй боловч сайхан ажил гэж үздэг” гэлээ. Тэрээр ингэснээс спортын холбоодыг удирдаж буй хамгийн залуу ерөнхийлөгч болж байна.  Мөн Тайландын Бангкок хотноо 2016 оны бодибилдинг, фитнессийн Дэлхийн аварга шалгаруулах тэмцээн өчигдрөөс эхэллээ.  Тус тэмцээнд Монголын бодибилдинг, фитнессийн холбооны эрэгтэй 10, эмэгтэй зургаа, нийт 16 тамирчин оролцохоор эх орноосоо мордлоо. Энэ удаагийн ДАШТ-д 59 орны 600 гаруй тамирчид оролцохоор мэдүүлгээ өгчээ.Бодибилдинг, фитнессийн ДАШТ нь нийт 36 ангилалд болдог. Манай тамирчид бодибилдинг, атлетик, фитнес, модель, спорт модель гэсэн төрлүүдэд оролцох юм байна. ДАШТ-д шүүгчээр Монголын бодибилдинг, фитнессийн холбооны Ерөнхий нарийн бичгийн дарга С.Одбаатар ажиллахаар болжээ. Түүний хувьд олон улсын зургаа дахь тэмцээндээ шүүгчээр ажиллах аж. ДАШТ-д оролцож байгаа баг тамирчдыг “Пэпси” брэнд дэмжин ажиллаж байгаа юм байна. 2017 онд тус холбооноос тэмцээн, уралдаан олноор зохион байгуулахаар болжээ. Жил бүр болдог хот, улсын аваргын тэмцээнийг өвөрмөц байдлаар зохион байгуулахаар төлөвлөж байгаа аж. Өөрөөр хэлбэл, тус спортыг үзэгчдэд илүү ойр байлгах үүднээс сонирхолтой хэлбэрээр хийхээс гадна шагналын санг өндөр хэмжээнд байлгах аж. Мөн анх удаа бодибилдинг, фитнессийн ДАШТ-ийг Монгол Улсад зохион байгуулахаар болсныг өчигдөр болсон хэвлэлийн хурлын үеэр дуулгалаа. Энэхүү тэмцээн Улаанбаатар хотноо 2017 оны аравдугаар сарын 3-9-ний өдөр болох аж. Тус тэмцээнд дэлхийн 61 орны 1000 гаруй тамирчид оролцох боломжтой гэнэ.

Эх сурвалж:www.polit.mn