Ч.ЗОТОЛ

 УИХ-ын гишүүн О.Баасанхүү  нэр бүхий гишүүдийн хамт Их хурал  дотор гэр бүлийн хүчирхийлэлтэй тэмцэх, хууль тогтоомжийг боловсронгуй болгох зорилгоор "Гэр бүлийн хүчирхийлэлтэй тэмцэх Улсын Их Хурлын гишүүдийн лобби бүлэг"-ийг байгуулснаа мэдэгдлээ.  

Нийгэмд өнөөдөр тулгамдаад буй нэг чухал асуудал нь яах аргагүй гэр бүлийн хүчирхийллийн асуудал юм. 2010-2016 оны байдлаар Монгол Улсын хэмжээнд 5100 хүн гэр бүлийн хүчирхийлэлд өртөж гэмтэл бэртэл авсан нь бүртгэгджээ. Мөн энэ хугацаанд 95 хүн нас барсан байна. 2016 оны эхний хагас жилийн байдлаар гэр бүлийн хүчирхийлэлтэй холбоотой 764 хэрэг бүртгэгдсэн. Энэ нь өнгөрсөн онтой харьцуулахад 178-аар нэмэгдсэн байгаа юм. Өөрөөр хэлбэл, гэр бүлийн хүчирхийллийн гэмт хэрэг, зөрчил өдрөөс өдөрт тогтмол нэмэгдэж байгаа нь сэтгэл эмзэглүүлж байна. Иймд энэ харилцаанд өөрчлөлт оруулах цаг үе ирсэн байна. 

Энэхүү бүлэгт УИХ-ын гишүүн, Төрийн байгуулалтын байнгын хорооны дарга Н.Энхболд, УИХ-ын гишүүн, УИХ дахь АН-ын бүлгийн дэд дарга Ж.Батзандан, УИХ-ын гишүүн, Өргөдлийн байнгын хорооны дарга Д.Сарангэрэл, УИХ-ын гишүүн Х.Нямбаатар, Д.Цогтбаатар, Н.Амарзаяа, М.Билэгт нар тус тус дэмжиж нэгдсэн байна. 
Лобби бүлэг байгуулагдсан тухай мэдээллийг  О.Баасанхүү гишүүн УИХ-ын дарга М.Энхболдод  албан ёсоор мэдэгдсэн гээд “Та бүхэн ч гэсэн надтай нэгдээрэй, хамтдаа тэмцэцгээе!” хэмээн уриалжээ.