Д.ГАЛТ

Бурхны шашны гэгээрсэн хутагт хувилгаад дараа нь хаана ямар төрөл олохоо мэдэж байна гэдэг. Есдүгээр Богд таалал болохоосоо өмнө дараа төрөлдөө Монголд мэндэлнэ гэдгээ хэлсэн  гэх нь ч бий. Тиймээс Далай багш Монголд ирэх гэж байгаа сургаар л аравдугаар Богдыг тодруулах нь гэдэг хүлээлт байсан билээ. Хүлээлтэд Далай багш “Аравдугаар Богд Монголд мэндэлсэн” гэдэг хариулт өглөө. Гэхдээ бас битүү, хатуу маягтай.  Аравдугаар Богд Монголд төрсөн шинж тэмдэг мэдэгдэж байгаа. Гэхдээ чухам хэн бэ гэдгийг өнөөдөр зарлахад хэцүү. Нас бага байгаа гэх. Шууд тэр гээд нэрлээд заачихаагүй болохоор монголчууд шинэ Богд хаанаас тодров гэдэг асуулттай үлдэв. Далай ламын хэлсэн, гурав, таван нас хүрэг гэдэг үгнээс үзвэл Богд гэгээний хойд дүр одоогоор гурван нас ч хүрээгүй балчир байгаа бололтой. Тиймээс аравдугаар Богд хаанаас тодров гэдгийн хариуг мэдэхэд багаар бодоход хоёр жилийн хугацаа хэрэгтэй гэж хэлж болохоор байгаа юм. Ямартай ч Далай ламын Монголд хийсэн айлчлалаар Богд гэгээний хойд дүр Монголд мэндэлсэн гэдэг нь тодорхой боллоо, харин чухам хэн бэ гэдгийг цаг хугацаа бидэнд харуулах нь ээ.

Дашрамд дурдахад, шинэ Богд Монголын ихэс дээдсийн хүрээний гэр бүлдээс мэндлэх сураг дуулдсаар удаж байгаа билээ.

Эх сурвалж: www.polit.mn