Өнөөдөр зулын-25

Ч.Олдох

Өнөөдөр билгийн тооллын 25 буюу бидний нэрлэж заншсанаар Зулын 25. Энэ өдрийг  цаг тооны  тугчин  одтой, цагаан нохой өдөр.Энэ өдөр найз нөхдийг түшин ажил үйлийг түргэн бүтээх, бүтээл туурвил эхлэх, аливаа цар ихтэй үйлсийг эхлэх, бясалгал хийх, ном буянд шамдах, өглөх өгөх лус тахих, нүүдэл суудал хийхэд сайн гэжээ. Мөн аливаа явдал үйлд хянамгай хандах, биеэ энхрийлүүштэй  гэсэн байна. Хамгийн гол нь энэ өдрийг  монголчууд ''Зулын 25" буюу "Богд ламын дүйчэн" өдөр хэмээн олон зуун жил тэмдэглэж бурхны шашны сүм,  хийдүүд мянган тахилын зул хүж өргөж, их ерөөл хурдаг. Айл бүхэн зул асаан их буян үйлддэг уламжлалтай.

Тиймээс Гарма Гаржүд Үржинпэрэнлэйлан хийдийн тэргүүн, гэвш Д.Тайвансайхан энэ өдөр хийддээ сүсэгтэн олны хамт  1000 зул өргөх, буян номын ажлыг зохион байгуулж байна.

Тэрээр хэлэхдээ  “Улааны шашны тэргүүн IV  Гармаба  Оролбидорж нь  Богд Зонховыг гурван настай байхад нь сахил хvртээсэн сахилын багш нь юм.  Мөн тэрээр Тогоон төмөрийн багш нь байсан. Тиймээс манай хоёр урсгал нягт уялдаа холбоотой. Иймээс жил бүр зулын 25-ныг тэмдэглэж ном хурлыг ажлыг тогтмол хийж ирсэн. Уламжлалын дагуу 1000 зул өргөх хурал номын ажлыг эхлүүлж байна” гэлээ.

Энэ өдөрр уншсан хийгээд өргөсөн  бvхий л үйл,  буян хэдэн арав дахин арвиждаг  гэж бурханы номд  үздэг юм байна.