Ч.ЗОТОЛ

Дээрхийн гэгээнтэн XIV Далай лам Монголын сүм хийдүүд, бурхны шашны шавь нар, сүсэгтэн олны хүсэлтээр манай улсад айлчлал хийгээд өнөөдөр буцаж байна. Тэрээр буцахын өмнө өнөө өглөө 6.30 цагт хэвлэл, мэдээллийнхэнтэй уулзсан юм. Гандантэгчинлэн хийдээс зохион байгуулсан тус  хэвлэлийн хуралд Далай лам өөрийн ирсэн учир шалтгаан, үзэл бодол, цаашид баримтлах бодлогоо тодорхой хэлсэн. Мөн сэтгүүлчдийн асуултад нээлттэй хариуллаа. Тэрээр бурхны шашинтай орнуудаас хоёр улсад төвөггүй айлчилж байгаагаа  онцлоод түүний нэг нь Монгол Улс гэв. Бурхны шашны үнэнч шавь нар, Монголын сүсэгтнүүдийн урилгаар Монгол Улсад дахин ирсэндээ  баяртай байгаагаа хэлэв. Өөрийгөө IХ.Богдтой бүр жаахан байхаас нь хамт байсны хувьд сайн мэдэх хүний нэг гээд түүнийг жанч халахаас өмнө уулзахдаа “Таны дараагийн дүр  Монголд л тодорно шүү” гэж хэлж байснаа дурсав. Мөн тэрээр энэ удаа IХ Богдын хойд дүр буюу  Х Богдыг тордуулсан гэдгээ хэллээ. Гэхдээ тэрээр одоо жаахан байгаа учраас  3-4 насанд нь юм уу, таван нас хүрэхээр нь ил болгож зарлах нь зүйтэй гэсэн байр суурьтай байгаагаа хэвлэлийнхэнд дуулгав. Ийнхүү тэрээр  монголчуудын дунд үүсээд байсан талцал маргаанд цэг тавиад буцлаа.

Х Богдыг Далай лам хэлэхдээ “Тэр дэндүү жаахан байна, 3-4 нас эсвэл таван настайд нь олон ил зарлана”  гэснээс үзвэл өдгөө хоёр настай болох нь ойлгогдож байна. Харин хэний үр сад, хаанаас тодруулав гэдэг нь нууц хэвээр үлдлээ.

Эх сурвалж: Polit.mn