Б.Туул

Баян-Өлгий аймгийн Булган, Сагсай сумын нутгаар их хэмжээний цас орсноор малын бэлчээр дарагдан, даваануудын зам хаагдаад байгаа ажээ. Уг асуудлыг аймгийн Онцгой байдлын комисс авч хэлэлцээд, аймгийн Засаг дарга захирамж гарган, Засаг даргын орлогчоор ахлуулсан ажлын хэсэг байгуулж, холбогдох бүх байгууллагыг шуурхайлан дайчилж эхлээд байгааг тус аймгийн сэтгүүлч мэдээлж байна.  Ялангуяа жил болгон Ховд аймгийн нутагт өвлийн отор хийдэг Булган сумын мал онцгой хорио цээрийн улмаас тийшээ оторлох боломжгүй болсноор тэдний малыг Дэлүүн, Толбо сум руу оруулах арга хэмжээ авч байгаа аж. Мөн аймгийн төвөөс Булган сум, Яринтын боомтод хүрэх Улаагчины даваа хаагдсан тул “Жол” компанийн замчид болон Зэвсэгт хүчний Өлгийд байрласан ангийн дайчид тэнд хүчээ төвлөрүүлж байна. Уг сумын нутгаар орсон цасны хэмжээ 30-100 см хүрсэн тул жирэмсэн эхчүүдийг аймгийн төвд ирүүлэх зэрэг арга хэмжээ авч байна.

Сагсай сумын нутаг мөн адил их цасанд дарагдсан тул онцгой байдлын алба, эрүүл мэнд, хөдөө аж ахуйн байгууллагаас тусламж хүргүүлээд эхэлсэн байна. Гамшигтай эдгээр сумдын аюулгүйн нөөцөд боломжийн өвс тэжээл байгаа, байдал хэцүүдвэл Засгийн газрын зөвшөөрлөөр гаргахаар төлөвлөөд байна.

Эх сурвалж: www.polit.mn