Б.Туул

ОБЕГ-ын Гамшгийн шуурхай удирдлагын газрын дарга, хурандаа Б.Ууганбаяраар ахлуулсан ажлын хэсэг Хэнтий аймагт ажиллах үеэрээ цас ахиу орсон өвөлжилт хүндэрч болзошгүй зарим сумдад очиж ажиллажээ. Ажлын хэсгийнхэн эхлээд Бэрх тосгоны өвөлжилтийн бэлтгэл байдал, сумын нөөцийн сан болон тосгонд шинээр баригдаж буй Онцгой байдлын шинэ байртай танилцсан байна. Тус тосгонд тулгамдаж буй гол асуудал нь дулааны шугам сүлжээ.  Ил байрладаг учраас өвлийн хүйтэнд хөлдөх аюул ойрхон байна Тиймээс энэ асуудлыг анхааралдаа авахыг хүслээ. Үүний дараа ажлын хэсгийнхэн Батноров суманд зочилж, сумын Засаг дарга, сумын Онцгой комиссын гишүүдтэй уулзаж, тулгамдаж буй асуудлуудыг хэлэлцэж, эрсдлийн үнэлгээ болон гамшгаас хамгаалах төлөвлөгөө гаргахыг үүрэг болголоо. Тус сумын нутагт анхны цас өнгөрсөн сарын 16-наас эхлэн орж, түүнээс хойш их бага хэмжээгээр 14 удаа тунадас орсны улмаас газар нутгийн 90 хувьд нь цасан бүрхүүл тогтож, тал газраа 17-25 см, уулын энгэр гуу жалгаараа 30-60 см хүрч мал бэлчих боломжгүй болжээ. Сумын онцгой комисс аравдугаар сарын байдлаар сэрэмжлүүлэх мэдээг нийт 1270 хүний утсанд илгээсэн байна. Батноров сумын долоон багт 800 гаруй малчин өрхийн 395700 толгой мал өвөлжиж байна гэдгийг Хэнтий аймгийн сэтгүүлч Д.Одонтунгалаг мэдээлж байна.

Эх сурвалж: www.polit.mn