Монгол Улсын Ерөнхийлөгч Ц.Элбэгдоржийн 2016 оны 11 дүгээр сарын 15-ны өдрийн150 дугаар зарлигаар анхан шатны шүүхийн шүүгчийн албан тушаалд зургаан шүүгчийг томиллоо. 

Энэхүү томилгоогоор Баянгол дүүргийн иргэний хэргийн анхан шатны шүүхэд шүүгчээр М.Мөнхтөр шинээр томилогдсон байна. Тус шүүхийн хамт олон шинээр томилогдсон шүүгчийнхээ тангараг өргөх ёслолын ажиллагааг өөрийн шүүхийн байранд зохион байгуулав. 

Баянгол дүүргийн иргэний хэргийн анхан шатны шүүхийн ерөнхий шүүгчийг түр орлон гүйцэтгэгч Р.Алтантуяа Томилогдон ирсэн шүүгчдээ баяр хүргэж, тангараг өргөх ёслолын үйл ажиллагааг нээлээ. Шүүгч Р.Алтантуяа хэлсэн үгэндээ "Хүн хорвоод мэндэлсэн цагаасаа эцэг эхийн хайрласан нэрээрээ дуудуулж явдаг бол шүүгч болсноор өөрийн нэрийн өмнө шүүгч хэмээх эрхэм хүндтэй нэрийг нэрийнхээ өмнө дуудуулж эхэлдэг. Энэ нь эрх зүйч хүний хувьд нэг талдаа бахархал боловч нөгөө талаад шүүгч байна гэдэг амаргүй. Хуулийн өмнө хүлээсэн үүргээ нэр төртэйгээр биелүүлж, шүүн таслах үйл ажиллагаандаа амжилт гаргахыг хүсье. Энэ удаад шүүхэд ажиллаж байсан хүн томилогдон ирсэнд шүүгч бидний хувьд талархууштай явдал боллоо” хэмээн онцлон хэлсэн юм.