Х.ХАТАН

“Татами” гэх өвөрмөц нэртэй тууж, өгүүллэг, шүлгийн ном хэвлэлтээс гарчээ. Соёлын гавьяат зүтгэлтэн зохиолч, яруу найрагч Ш.Гүрбазар номын өмнөтгөлд “Аливааг цаг үргэлж бодож эргэцүүлж суудаг хүний дэргэд байхад сэтгэлд нөмөртэй байдаг шиг Б.Азын бодрол өгүүллэгүүд, тууж танд эгээрэх бодохын их нэмэр болно гэдэгт би огт эргэлзэхгүй байна.

“Бэлд нь янцгаасан унаганы дууг оргил нь сонсдог” гэж миний багш Б.Лхагвасүрэн анхны номын минь өмнөтгөлд бичиж билээ. Ах нь энэ үгийг Б.Аз дүүдээ хадаг мэт барья. Зуун намар үзээрэй” гэж бичсэн байв.

Номын зохиогч Б.Аз бол сэтгүүлч, зохиолч мэргэжилтэй хүн биш. Харин өөрийн хүсэл сонирхлоороо амьдралын давтагдашгүй агшинг цаасан дээр буулгаж чаддаг авьяастай нэгэн юм. Тэрээр одоогоос долоон жилийн өмнө гадаадад сурдаг багын найзынхаа хүсэлтээр ээжид нь төрсөн өдрийн бэлэг цэцэг хүргэж өгчихөөд буцаж явахдаа “Ээжийнхээ ачийг хариулчихлаа” гэх богино өгүүллэг бичиж утга зохиолын ертөнцөд хөл тавьсан нэгэн.

“Татами” номонд хэдийн утга зохиолд шимтэгсдэд үнэлэгдсэн “Үнэ цэнэ”, “Эхнэртээ бичсэн захиа”, “Хүн чулууны түүх” зэрэг олон сонирхолтой өгүүллэг, туужууд нь багтжээ.

Зохиогч номынхоо тухайд “Хамгийн сайн нь биш ч хамгийн сайнаараа хичээж бичсэн богино өгүүллэгүүд, шүлэг, туужаас бүрдсэн “Татами” номоо та бүхний сонорт өргөн барилаа. Авах, гээхийн ухаанаар уншихыг хүсье” гэсэн юм.

Хүний ертөнцийн өвөрмөц өнгийг мэдрүүлэх Б.Азын “Татами” номыг Интерном, Азхур номын дэлгүүрүүдээс худалдан авч уншаарай.

Эх сурвалж: “Зууны мэдээ” сонин