Л.ХЭРЛЭН

Сүхбаатар аймгийн Засаг дарга асан Ж.Батсуурь 2016 оны УИХ-ын болон ИТХ-ын сонгуулиас хойш анх удаа олны өмнө ил гарав. Тэрээр өнөөдөр  Төрийн ордонд Чингис хаан одон гардуулах ёслолд уригдсан хүндтэй зочдын дунд ирсэн харагдсан. Ёслолын үеэр тэрээр энэ жилийн Чингис хааны одонг хүртсэн  П.И.Чайковскийн нэрэмжит олон улсын мэргэжлийн дуурийн дуулаачдын XV уралдааны I байрын болон Гранпри шагналт, Монгол Улсын гавьяат жүжигчин   Г.Ариунбаатар хамт авахуулсан зургаа  “Монгол Улсын Төрийн дээд шагнал, Тэргүүн зэргийн одон ЧИНГИС ХААН одон гардуулах ёслолд уригдан оролцлоо” хэмээн өөрийн цахим хуудаст оруулсан байв.  Харин зургийн доор “Хоёр сайхан залуу”, “Аймгаа хөгжүүлсэн дарга” гэх зэргээр сэтгэгдлүүд хөвөрсөн байна.

Ж.Батсуурь   Сүхбаатар аймгийн АН-ыг даргалахдаа 2004, 2008, 2012 онд дараалсан ялалтуудыг авч орон нутгаа улсын хэмжээнд жишиг аймаг болгон хөгжүүлж чадсан.  АН-ын түүхэнд орон нутгийн сонгуульд гурав дараалан  ялалт байгуулж чадсан шилдэг удирдагч түүнээс өөр үгүй. Тэгвэл энэ жил дөрөв дэх удаагаа  2016 оны сум, дүүргийн ИТХ-д ч Сүхбаатар аймгийн АН ялалт байгуулж олонх болоод байгаа юм. Тус сонгуулиар аймгийн ИТХ –д МАН 16, АН 16 суудал авч нэг тойрогт нөхөн сонгууль үлдээд байсанд АН ялсанаар асуудал эцэслэн шийдэгдсэн. ИТХ-ын сонгуульд АН-ынхаа штабыг удирдаж оролцсон түүнийг Засаг даргын ажлыг үргэлжүүлэн хийгээсэй гэсэн хүлээлт Сүхбаатарчуудад  үүсээд байгаа. Тиймээс   олны өмнө гарсан нь  хүмүүсийн анхаарлыг татсан бололтой.  

Эх сурвалж: www.polit.mn