Б.БАЯР

“Чингис хаан” ОУНБ-д энэ сарын 28-нд он байдал зарлалаа.  Энэ нь “Код -7”  хэмээх тусгай нууц код буюу тэсрэх бөмбөг тавьсан үед зарладаг онц байдал байв.

Үдээс хойш 17 цагийн үеэс эхэлсэн онц байдал үдшийн 22:30 цаг хүртэл үргэлжилсэн юм. Эхлээд нисэх буудлын ажилчдыг байгаа газраасаа хөдлөхгүй байх үүрэг өгч, хууль хяналтын байгууллагынхан нисэх буудлын хамгаалалтын албаны хүмүүстэй хамтран ажиллаж байв.

18 цаг өнгөрөхөд үүсээд байгаа нөхцөл байдалтай холбогдуулан ИНЕГ, "Чингис хаан" ОУНБ-ын бүх удирдлага шуурхай хуралдсан.

Харин 19 цагийн үед “Чингис хаан” ОУНБ-ын хоёрдугаар давхарт хорио тогтоож, нислэгүүдийг түр саатуулж, зорчигчдыг онгоцноос буулгахгүй байв. 

Ингээд үдшийн 22 цагийн үед ИНЕГ-аас мэдэгдэл гаргав. Уг мэдэгдэлд “...2016 оны аравдугаар сарын 28-ны өдрийн 16.20 цагт тус нисэх буудлын Аюулгүй байдлын газар нийтийн эзэмшлийн талбайд эзэнгүй тээш байгааг илрүүлж, зохих журмын дагуу хамгаалалтад авч, тодорхой байдлаар шалгаж үзэхэд аюултай байж болзошгүй сэжиг илэрсэн. Аюулгүй байдлыг хангах үүднээс Олон улсын иргэний нисэхийн дүрэмд заасны дагуу шаардлагатай арга хэмжээг шуурхай авч, холбогдох хууль хяналтын байгууллагууд шалгалт хийсний дүнд эзэнгүй тээш аюулгүй болохыг тогтоолоо. Мөн тээшний эзэн холбогдогчийг илрүүлж, газар дээр нь ирүүлэн тээшийг таниулж, тус иргэнийх мөн болохыг нь тогтоолоо.“Чингис хаан” олон улсын нисэх буудалд дуудлагын дагуу үйлчилгээ хийсэн кабелийн сувгийн ажилтан кабелийн суваг засварлах техник хэрэгслээ санаандгүй байдлаар орхиж явсан байсныг хууль хяналтын байгууллагууд үргэлжүүлэн шалгаж байна. Үүссэн нөхцөл байдалтай холбогдон Улаанбаатар-Бээжин, Улаанбаатар-Манжуур чиглэлийн нислэгүүд түр саатсан бөгөөд одоо тус нисэх буудлын үйл ажиллагаа хэвийн явагдаж байна" гэсэн байв.

Яг үнэндээ үүнд ингэтлээ сүржигнэх шаардлагагүй байсан гэх юм билээ. Учир нь тэнд үйлчилгээ үзүүлсэн “Юнивишн”ХХК-ийн засварчин л цүнхээ мартаад явчихсан байжээ. Гэтэл манайхан хэдэн цагийн турш засварчны цүнхтэй “ноцолдсон” болж таарч байгаа юм. Багажтай цүхний учрыг олох гэж ингэтлээ ажиллаж байгаа мэргэжилтнүүд хэрэвзээ жинхэнэ тэсрэх бодис тэр цүнхэнд байсан бол яах байсан бол... Нөгөө талаар засварчин нь цүнхээ мартсанаас болж улсад учруулсан нэлээд хэмжээний хохирлыг “Юнивишн” ХХК төлөх үү гэдэг асуулт гарч  ирж байгаа юм.

Эх сурвалж: www.polit.mn