Х.ХАТАН

Монголын Сэтгүүлчдийн нэгдсэн эвлэл, БНСУ-ын элчин сайдын яам хамтран өнгөрсөн баасан, бямба гаригт Сэтгүүлчдийн спорт өдөрлөгийг Тэрэлж байгалийн цогцолбор газар “Хос хад” жуулчны баазад зохион байгууллаа. Өдөр тутамд мэдээ мэдээллийн хойноос цаг наргүй гүйж явдаг хэвлэл мэдээллийн байгууллагын ажилтнууд болон БНСУ-ын Элчин сайдын яамны ажилчид нийлсэн 80 гаруй хүн хоёр өдрийн арга хэмжээнд оролцсон юм.

Монгол сурын харвааны “Онч” клубын тамирчид өнө эртнээс түүхтэй Монгол сурын харваа ямар үүсэл гарал, утга учир, дэг жаягтай байдгийг тайлбарлаж, хэрхэн зөв харвах талаар мэдээлэл өгч, сургалт зохион байгуулсан. Ингээд Монгол сурын харвааны наадамд гурван сэтгүүлч, нэг элчингийн ажилтнаас бүрдсэн дөрвөн гишүүнтэй, найман баг өрсөлдөж цэц мэргэнээ сорилоо. Анх удаа нум агсаж, сум тавьж үзсэн ч шинэхэн харваачид онч мэргэн байлаа.

Ингээд найман багаас эхний гурван байрыг эзлүүлж мөнгөн шагнал, медаль, өргөмжлөлөөр шагнасан бол тэргүүн байранд цом гардуулсан юм. Харин мэргэн харваачдыг “Монцамэ” агетнлагийн спортын сэтгүүлч Д.Өлзийсайхан тэргүүлж, хоёрдугаар байрт “Монта” теле студийн оператор Ч.Гэрэлт-Од шалгарч, гуравдугаар байранд “Хүмүүн бичиг” сонины эрхлэгч Б.Элбэгзаяа орсон юм.

Мөн “Солонгос улсыг хэн сайн мэдэх вэ?” асуулт хариултын тэмцээн болж “Засгийн газрын мэдээ” сонины дизайнер н.Хулан, Zaluu.com сайтын дэд захирал н.Мөнзул нар Seoul, Busan явах онгоцны тийзээр шагнууллаа.

Энэхүү спортын арга хэмжээг хамтран зохион байгуулахад голлох үүрэг гүйцэтгэсэн БНСУ-аас Монгол Улсад суугаа элчин сайд У Сунийг Монголын сэтгүүлчдийн нэгдсэн эвлэлийн хүндэт медалиар шагнасан юм.

Эх сурвалж: “Зууны мэдээ” сонин