Р.ОЮУН

Дархлаажуулалтын 10 хоног эхэлсэн талаар ЭМЯ, ДЭМБ, ХӨСҮТ, НЭМХ хамтран мэдээлэл хийлээ. Энэ жилийг “Хепатитын В вирусын халдвараас сэргийлье” уриан дор тэмдэглэх аж. Мөн өнгөрсөн онд улаанбурхан өвчний дэгдэлт гарсантай холбогдуулан бага насны хүүхэд, 18-аас дээш насны залуучуудыг дархлаажуулалтад хамруулснаар өвчлөл 88.1-93.4 хувь буурсан байна. Хүйтний улиралд бага насны хүүхдийн дунд амьсгалын өвчлөл ялангуяа, томуу, томуу төст өвчний дэгдэлт ихэсдэг. ДЭМБ-ын судалгаагаар таван хүүхэд тутмын нэг нь хатгаа өвчний хүндрэлээр нас барж байгаа нь үүнтэй тэмцэх, урьдчилан сэргийлэх ажлыг зохион байгуулах шаардлагатайг харуулж байна. Тиймээс нийслэл, таван аймгийн зургаан сар хүрсэн хүүхдийг улаанбурхан өвчний эсрэг сэргийлэх тарилгын тэг тунгаар дархлаажуулах, нэмэлт дархлаажуулалтаас хоцорсон 18-30 насны залуучууд, тав хүртэлх насны хүүхэд, эрүүл мэндийн ажилтнуудыг улирлын томуугийн вакцинд сайн дураар хамрагдахыг уриалж байв.

Эх сурвалж: “Зууны мэдээ” сонин