Ц.БАЯР

Энэ сарын 10-наас буюу ирэх даваа гарагаас  эхлэн хамгийн их машин зорчдог  Баруун болон зүүн  дөрвөн зам, Саппоро, Гэсэр сүм зэрэг дөрвөн уулзвараар жолооч нар гэрлэн дохио харгалзахгүй, баруун гар тийш чөлөөтэй эргэх журмыг туршилтаар мөрдөж эхлэх тухай Нийслэлийн замын Цагдаагийн газраас өнөөдөр /10.03/ мэдээллээ. Ингэхдээ эсрэг урсгалаас ирэх машинд болон явган хүний гарцаар гарч байгаа хүмүүст зам тавьж өгөх үүрэгтэй оролцох юм байна. Хэрэв дээрх дөрвөн уулзварт жолооч нар чөлөөтэй баруун эргэх туршилт амжилттай болбол үлдсэн уулзваруудад ч гэрлэн дохио харгалзахгүй баруун гар тийш эргэх журмыг батлах юм. Жолооч нарын тухайд заавал гэрлэн дохиог хүлээх бус, тухайн эгнээ чөлөөтэй үед шууд баруун эргэх нь цаг хугацаа хэмнэсэн шийдвэр гэж харж байна. Мөн төв замын томоохон уулзваруудад гэрлэн дохионы зохицуулалтаас болж, авто машины түгжрэл үүсдэг. Энэхүү туршилтыг нэвтрүүлсэнээр замын түгжрэл 20 хувь хүртэл буурах магадлалтай гэж тооцжээ.

Эх сурвалж:www.polit.mn