Жил бүрийн аравдугаар сарын 1-ний өдрийг "Олон улсын болон Монгол Улсын ахмадын өдөр" болгон тэмдэглэн өнгөрүүлдэг билээ. ЗХЖШ-ын удирдлагууд жил бүрийн энэ өдрүүдэд ахмад буурлуудаа хүлээн авч, хүндэтгэл үзүүлдэг уламжлалтай.Ахмадууддаа хүндэтгэл үзүүлдэг энэ жишгийн дагуу ЗХЖШ-ын дарга, хошууч генерал Д.Даваа өнөөдөр /2016.09.29/ Зэвсэгт хүчинд ажиллаж байсан ахмад үеийнхнээ Зэвсэгт хүчний 032 дугаар ангийн Соёлын төвд хүлээн авсан юм.Тэрээр "Бидний бахархан дуурайж ирсэн ахмад үеийнхэндээ "Ахмадын өдөр"-ийг тохиолдуулан баярын мэнд хүргэе.Зэвсэгт хүчний хөгжлийн нэгэн үеийг амжилттай үүрч явсан та бүхнээрээ бахархаж байна.Монгол Улсын Зэвсэгт хүчний түүхийн хуудсанд тод мөрөө үлдээсэн Та бүхэн батлан хамгаалах бодлого, зорилт, Зэвсэгт хүчний үүрэг гүйцэтгэх чадамжийг нэмэгдүүлэх, ялангуяа өсвөр үе, залуучуудад эх оронч үзэл хүмүүжил төлөвшүүлэх, дадлагаар олж авсан арвин баялаг туршлагаа өвлүүлэх эрхэм хүндтэй үйл хэрэгт үнэтэй хувь нэмэр оруулж байгааг тэмдэглэн хэлэхэд таатай байна" хэмээн онцлоод Батлан хамгаалахын сайд болон ЗХЖШ-ын даргын тушаалаар нэр бүхий ахмадуудад "Эх орнытөлөө", Чөлөөлөх дайны ялалтын 70 жилийн ойн медаль, Ахмад дайчин зэрэг медалиудыг гардуулан өгсөн юм. Энэ үеэр ахмадуудад МаршалЮ.Цэдэнбалын мэндэлсний 100 жилийн ойд зориулсан үзэсгэлэнг сонирхуулж, ЦДБЭЧ-ын уран бүтээлчдийн тоглолтыг толилуулсан юм.

Эх сурвалж: www.polit.mn