Б.БАЯР

УБТЗ-ын даргаар Д.Жигжиднямаа томилогджээ. Уг нь Оросын тал монгол захирал томилохгүй гэсэн байр суурьтай байсан юм. Гэвч араас нь гомдол, хүсэлт болсон хүмүүс хэвлэлээр бие биеэ “гөвөөд” байх шинжтэй. Учир нь энэ албан тушаал тойрсон манайхны “яриа хэлээ” Монголоос халиад явчихаж.

Москвад болсон  УБТЗ-ын Ерөнхий хорооны хуралд оролцсон эрхмүүд Монголын нэр төрийг шившигтэй хутгалаа гээд л мэдээлээд эхлэв.

Тодруулбал, УБТЗ-ын ерөнхий хорооны хурлыг Монгол Улсын Зам тээврийн хөгжлийн яамны хүсэлтээр ОХУ-ын Москва хотноо уржигдар /2016.09.27/ зохион байгуулсан юм.  УБТЗ-ын ерөнхий хорооны орлогч дарга, Зам тээврийн хөгжлийн дэд сайд Б.Цогтгэрэл тэргүүтэй Монголын тал нэр дэвшүүлсэх хүнээ ОХУ-ын талд санал болгожээ.  Гэвч хувь  нийлүүлэгч ОХУ-ын "РЖД" нийгэмлэгээс шаардлагагүй хэмээн үзэж хэлэлцэх асуултын жагсаалтаас хассан аж.

Гэтэл  Зам тээврийн хөгжлийн дэд сайд Б.Цогтгэрэл, ЗТХЯ-ны газрын дарга Б.Артур, ЗГХЭГ-ын референт орчуулагч Н.Буяндэлгэр нарын УБТЗ-ын ерөнхий хорооны Монголын талын гишүүд үндсэн дөрвөн асуудлыг хэлэлцсэн протоколд гарын үсэг зурахаас татгалзжээ. Өөрөөр хэлбэл, УБТЗ-ын даргыг солих асуудлыг дэмжээгүйд бухимдаж ийнхүү эсэргүүцжээ. Уурлаж бухимдсан манай дарга нар бараг л олимпийн медалиа луйвардуулсантай адил өмд, гутлаа тайлан тэмцэл өрнүүлэх шахаж.  Монгол дарга нарын тэмцэл уур ундуйцлаас болж ганц өдөр л хуралддаг байсан ерөнхий хорооны хурал хаалтаа хийж чадахгүйд хүрчээ. Нөхцөл байдал буруугаар эргэмэгц дэд сайд Б.Цогтгэрэл УИХ-ын дарга М.Энхболдод асуудлыг танилцуулснаар "РЖД" нийгэмлэгийн ерөнхийлөгч О.В.Белозёровтой холбогджээ. Ийн эцэст нь Д.Жигжиднямааг томилох шийдвэрийг гаргасан байна. Энэ тухай дэд сайд Б.Цогтгэрэл өчигдөр фейсбүүк хуудсаараа мэдээлсэн байв.

Эх сурвалж: www.polit.mn