С.САРУУЛ

Сонгинохайрхан дүүргийн 22 дугаар хороонд  их хэмжээний бороо орсны улмаас өчигдөр 2016.09.23 НОБГ усанд автсан 14 дуудлага ирсэн байна. Дуудлагаар дүүргийн Онцгой байдлын хэлтсийн 25 албан хаагч шуурхай ажиллаж усанд автсан 12 иргэний амь насыг авран хамгаалсан байна. Тухайлбал,  Тахилтын эцэс Канад хаус хорооллын зүүн урд талын жалганд үерийн усанд автомашинтайгаа урсч байсан дөрвөн иргэнийг гаргажээ. Мөн Тахилтын эцэст айлын монгол гэр, байшин нь үерийн усанд өртсөн. Тахилтын нэгдүгээр буудал төмөр замын нүхэн гарцын хойд талд хоёр том хүн, гурван хүүхэд, дөрвөн том хүн автомашинтайгаа суусан байсныг татаж гаргажээ. Тахилтын эцэст автомашин үерд автлаа гэсэн дуудлагыг ирүүлснээр нийслэлийн Аврах ангийн бүлгийг хүрэлцэн очиход Elantra загварын автомашинд байсан /43 настай,эм/, /6 настай,эр/ /14 настай,эм/, / 10 настай ,эм/ нар байсныг гаргаж аюулгүй газар хүргэсэн байна. Цаг уурын байгууллагаас өгсөн мэдээллээр есдүгээр сарын 25-нд ихэнх нутгаар, 26-нд нутгийн зүүн хэсгээр хур тунадас, нойтон цас орж, цасан шуурга шуурч хүйтрэх тул аюулгүй байдлаа хангаж, орон нутгийн замд гарахдаа машины бүрэн бүтэн байдлыг шалгаж, хувийн бэлтгэлээ хангахыг анхаарууллаа.

Эх сурвалж: www.polit.mn