С.УЯНГА

Таван яамны Төрийн нарийн бичгийн даргыг сонгон шалгаруулсан. Тэгвэл Төрийн нарийн бичгийн даргын ээлжит томилгоо Батлан хамгаалах яаманд өрнөх нь тодорхой болжээ. Гэхдээ сар гаруйн өмнөөс тус яамны Төрийн нарийн бичгийн дарга Б.Батсайханыг чөлөөлөх асуудал яригдаж, оронд нь томилогдох хүмүүсийн нэр дуулдаж эхэлсэн юм. Тодруулбал, цагдаагийн байгууллага, онцгой байдлын албанд ажиллаж байсан  Ц.Амгаланбаяр,  Х.Батбилэг нарын нэр нэлээд дээгүүр яригдаж байгаад чимээгүй болсон. Энэ удаад нэлээд хэдэн хүний нэр  батлан хамгаалахын Төрийн нарийн бичгийн даргын албан тушаалд дуулдаж эхэллээ.  Тухайлбал, УИХ-ын гишүүн Н.Номтойбаярын ойрын хүн гэгддэг генерал А.Ганбат, Нийслэлийн онцгой байдлын газрын даргаар ажиллаж байсан Х.Батбилэг нарын нэр идэвхтэй “явж” байна. Дээр нь нэмэгдээд Б.Бат-Эрдэнэ сайдын нутаг буюу Хэнтий чиглэлийн хурандаа нар ч Төрийн нарийн бичгийн даргын суудлыг ихээхэн сонирхож байгаа юм байна.

Яамны гал тогоог хариуцан ажилладаг одоогийн  Төрийн нарийн бичгийн дарга Б.Батсайхан салбарынхандаа тийм ч таатай нэр хэлэгддэггүй аж.Тиймээс цаашид  Монгол Улсын аюулгүй байдлыг нуруун дээрээ үүрч яваа онцлогтой салбар болох Батлан хамгаалах яамны Төрийн нарийн бичгийн даргаар мэргэжлийн хүн л ирээсэй гэсэн битүүхэн хүлээлт албан хаагчдын дунд бий болжээ.

Буу барьж, цэрэг командалж үзээгүй, эх орныхоо аюулгүй байдлын төлөө нэг ч өдөр санаагаа чилээж, хуруугаа хөдөлгөөгүй нөхдүүдийн нэр ч олон дуулдаж байгааг салбарынхан нь шүүмжилж байгаа гэнэ. Өнөөдөр батлан хамгаалах салбарт байлдагч, сонсогчоос ажлын гараагаа эхэлж ур чадвараараа ялгарсан  олон шилдэг офицер, генералууд байгааг ч дээрх мэдээллүүдээс бэлхнээ харж болохоор байна.

Эх сурвалж: “зууны мэдээ” сонин