Ц.БАЯР

2016 оны сум дүүргийн ИТХ-д төлөөлөлөө сонгох сонгуулийн хугацаа ойртож буй энэ өдрүүдэд Бүгд найрамдахчуудын олон улсын хүрээлэн /БНОУХ/, Канад улсын Гадаад хэргийн яамны дэмжлэгтэй 2016 оны УИХ-ын сонгуульд нэр дэвшиж, кампанит ажлаа өрнүүлсэн эмэгтэйчүүдийн талаар “Тэгш боломж” баримтат кино бүтээснээ /09.20/ олон нийтэд танилцууллаа. Уг бүтээлд МАН-ын гишүүн Б.Саранчимэг, АН-ын гишүүн Ц.Оюунгэрэл, МАХН-ын гишүүн Л.Сэлэнгэ, ИЗНН-ын гишүүн Д.Бадамханд, бие даан нэр дэвшигч М.Нарантуяа, ХҮН-ын гишүүн Б.Мөнхсоёл нарын сонгуулийн кампанит ажил болон саад бэрхшээлийг хэрхэн даван туулж байгаа тухай болон  засаглал, улс төр, жендэр, эдийн засаг, иргэний нийгмийн судлаач мэргэжилтнүүдийн тайлбартайгаар харуулжээ. Цаашид эмэгтэйчүүд улстөрд болоод шийдвэр гаргах төвшинд гарахын тулд юунд анхаарах нь чухал болохыг кинонд оролцогч нэр дэвшигч эмэгтэйчүүд сонгуулийн сурталчилгааны үед олж авсан туршлага зөвөлгөө үнэтэй болохыг уг киног санаачлагчдын зүгээс онцолж байсан. Нээлтийн дараа кинонд оролцсон нэр дэвшигчид нээлтэд оролцогчдын дунд  хэлэлцүүлэг өрнүүлсэн юм. Хэлэлцүүлэгийг IRI буюу Бүгд Найрамдахчуудын Олон Улсын Хүрээлэнгийн хөтөлбөрийн менежер Б.Бүрт-Үжин хөтөлсөн. Хүн амын 51 хувийг эмэгтэйчүүд эзэлдэг. Тиймээс эмэгтэйчүүдийг  шийдвэр гаргах түвшинд сонгохын тулд УИХ-ын 76 суудлын 30-ийг нь зөвхөн эмэгтэйчүүд өрсөлддөг байдлаар хуульд тусгах нь хамгийн зөв гарц гэж байлаа.

Эх сурвалж:www.zms.mn