Х.ЦОМ

Нийслэлийн засаг дарга асан Э.Бат-Үүлийг С.Зоригийн хэрэгт яллагдагчаар татсаныг эсэргүүцэж Ардчилсан хувьсгалын зүтгэлнүүд хэвлэлийнхэнд хандсан юм. СГЗ С.Амарсанаа, Төрийн соёрхолт, МУГЖ Д.Сосорбарам тэргүүтэй хүмүүс Ерөнхийлөгч Ц.Элбэгдорж болон хуулийн байгууллагад мэдэгдэл хүргүүлж байгаа хэллээ. Энэ үеэр гавъяат Д.Сосорбарам “ Коммунистууд төрийн толгойд гарахаар ийм зүйл хийдэг. Үүнийг таслан зогсоох цаг болсон. Бид хүний эрхийг дээдэлсэн нийгмийг байгуулж чадаагүй юм байна.  2000 оноос хойш хүний эрх бүрхэг болсон. Одооноос бугшмал зүйлээс ангижрах хувьсгал хийх цаг нь болжээ. С.Зоригийн аллагын цаана хамтран зүтгэж явсан нөхрийг нь гүтгэж хаячихаад буу шагайх гэж байна. Дуртай хүнээр буу шагайлгахгүй. Бид зүгээр суухгүй. Хатуу тэмцэнэ. Ерөнхийлөгч Ц.Элбэгдорж уг асуудлаар монголчуудын эв нэгдлийг хангасан үйлдэл хийгээсэй гэж хүсч байна.Дарангуйллын эсрэг би ганцаараа ч тэмцэж чадна" гэсэн юм. Ардчилсан холбооны гишүүн Х.Батчулуун  “С.Зоригийн хэрэг Зоригийнх биш боллоо. Энэ хэргийг илрээсэй гэж бид 20 жил хүлээж байна. Энэ хэргээр улс төрийн хамгийн хар бараан зүйлийг хийдэг боллоо.  Бид нэг хөдөлбөл яг 90 оных шиг хөдөлнө. Нэгийг нь хутгалж алаад нөгөөх нь амьдаар нь сүг болгох гэж байгаа бол бид нарыг бүгдийг нь аваачиж хориорой.  Зоригоор хэнийг алах уу гэдэг нь чухал боллоо. Бид үүнийг тэвчиж чадахгүй. Учир нь бид С.Зоригийн найзууд. Бид Монголын төлөө хоорондоо хэрэлддэг байснаас хувийн ашиг сонирхол байгаагүй”гэв.

Эх сурвалж: www.polit.mn