Г.СҮХ-ЭРДЭНЭ

Энэ жилээс урьдчилсан шатны тоглолтуудтайгаар зохиогдох болсон “Өсвөр, Идэрчүүдийн УАШТ” шигшээ тоглолтууд энэ сарын тавнаас эхэлж өнөөдөр аваргуудаа тодрууллаа. Шилдэгийн шилдэгүүдийг тодруулах энэ өдөр 11 хүртэлх насныханы медалийн төлөөх тоглолтуудаар эхэлсэн. Хүрэл медалийн тоглолтод “Арвис” өрсөлдөгч “Сумида”-г 4:0-ээр илүүрхэн, өнгөрсөн жилийн амжилтаа давтлаа. Харин аваргын төлөө тунаж үлдсэн “Дэрэн”, “Хараацай” багуудын тоглолт тун сонирхолтой өрнөж Э.Шинэбаяр дасгалжуулагчийн шавь нар тооны харьцааг нээсэн ч “Дэрэн” эргэн ирэлт хийсээр 4-2-ын харьцаатай ялалт байгуулсан. Харин 13 хүртэл насны медалийн төлөөх хоёр тоглолтод ердөө ганцхан гоол орсон. Гуравдугаар байрыг булаалдсан “Хоромхон”, “Сэлэнгэ Пресс”-ийн үндсэн цаг гоолгүй өндөрлөж ялагчийг торгуулийн цохилтоос тодруулахад “Хоромхон” шалгарлаа. Шигшээ тоглолтод “Хан-Уул” багийн У.Тэмүүжин чөлөөт цохилтоос нэгэн гоёмсог гоолыг оруулсанаар “Хараацай”-г буулган авсан. Шигшээ тоглолтуудын дараа болсон хаалтын үйл ажиллагаан дээр тэмцээний шилдэг тоглогчдыг тодруулахад: 11 хүртэлх нас -Шилдэг хаалгач: Б.Пүрэвдорж -Шилдэг хамгаалагч: З.Баясах -Шилдэг хагас хамгаалагч: Г.Төгөлдөр -Шилдэг довтлогч: Б.Энх-Эрдэнэ 13 хүртэлх нас -Шилдэг хаалгач: Г.Ган-Эрдэнэ -Шилдэг хамгаалагч: Т.Ууганбаяр -Шилдэг хагас хамгаалагч: Г.Буяннэмэх -Шилдэг довтлогч: Б.Бат-Эрдэнэ нар шалгарсан бол тэмцээнийг үнэн зөв шүүн явуулсан шилдэг шүүгчээр Э.Галбадрах тодорсон. Ийнхүү бага насныханы аваргууд амжилттай тодорсон бол 15, 17 хүртэлх насны ангилалын тэмцээн маргаашаас эхлэн МХБХ-ны ногоон талбайд явагдана.