Л.ХЭРЛЭН

Төв номын сан болон  соёл урлагийн салбарт харьяалагддаг  зарим газарт  даргын марафон далд өрнөж эхэлсэн сураг  саяхнаас дуулдах болов.  Гэхдээ шинэ томилгоо бүгд эрх барьж буй МАН-ын шийдвэрээр гарч байгаа. Одоо дуулдаж буй мэдээллээр яруу найрагч  бүсгүйчүүд дарга, захирлаар  томилогдох  газар цөөнгүй бололтой.  Тухайлбал, Төв номын сангийн захирлаар хошой  “Болор цом”-ын  эзэн, яруу найрагч Б.Ичинхорлоогийн нэр сонсогдож байна. 

Төв номын санг яруу найрагч, зохиолчид удирдсан тохиолдол өмнө нь бий. Тухайлбал, Соёлын гавьяат зүтгэлтэн, орчуулагч  Г.Аким, Соёлын гавьяат зүтгэлтэн, яруу найрагч Х.Чилаажав нар  энэ албыг ашиж байсан юм. Б.Ичинхорлоо найрагчийг Төв номын сангийн захирал болох нь гэсэн мэдээлэлтэй зэрэгцэн хэн нөлөөлөв, томилуулав гэхчлэн яриа хөөрөө ч гараад амжиж.  Засгийн газрын Хэрэг эрхлэх газрын даргаар “Болор цом”-тон найрагч Ж.Мөнхбат томилогдсон. Мөн  Зохиолчдын эвлэлийн  хорооны гүйцэтгэх захирлын албыг хашиж байсан “Болор цом”-тон  найрагч Г.Мөнхцэцэг УИХ-ын гишүүн болсон зэрэгтэй Төв номын сангийн захирлын томилгоог холбон ярих хүн ч цөөнгүй байна.

Эх сурвалж: www.polit.mn