Д.ЧИМЭГ

Монголын дотоодын их, дээд сургуулийн оюутнуудад, “Шинэ Монгол Мабүчи” сан сургалтын төлбөрийн хүүгүй зээлийн тэтгэлэг олгохоор болжээ. Өнгөрсөн оны хичээлийн жилээс монголын их, дээд сургуулийн 1, 3 дугаар ангид элсэн орж байгаа оюутнуудад тус сангаас сургалтын төлбөрийн хүүгүй зээл хэлбэрээр тэтгэлэг олгож эхэлсэн.

Уг тэтгэлгийг нэгдүгээр ангиасаа авсан оюутан дөрвөн жилийн турш, жил бүр 1500 ам.долларыг хүүгүй зээл хэлбэрээр авах боломжтой юм. Харин гуравдугаар ангийнхан мөн хэмжээний тэтгэлгийг хоёр жилийн хугацаанд авна. Тухайн оюутан сургуулиа төгссөн жилээс эхлэн жил тутам 1500 ам.доллартай тэнцэх хэмжээний мөнгийг эргүүлэн төлөх юм.

“Шинэ Монгол Мабүчи” сангийн тэтгэлэг нь эргэн төлөх нөхцөлтэй ч, хүү төлөхгүй. Түүнчлэн уян хатан нөхцлөөр батлан даагчийг тодорхойлдогоороо давуу талтай. Уг тэтгэлгийн гол зарчим нь “итгэлцэл” хэмээн тэтгэлгийн санг үүсгэн байгуулагчид тайлбарлалаа. Үүгээр дамжуулан итгэл, урам өгч цаашид илүү сайн суралцах, нийгэмд амжилттай бие хүн болох хүсэл тэмүүлэл, үүрэг хариуцлагаа ойлгоход нь туслах зорилготой ажээ.

Монголд суралцаж буй оюутнуудад энэхүү тэтгэлгийг олгох ажлыг тус сангийн тэтгэлгээр Японд сурч ирсэн залуучууд хариуцаж байна.

Дашрамд дурдахад, “Мабүчи Олон улсын тэтгэлгийн сан” (Mabuchi International Scholarship Foundation-MISF) нь 2005 онд үүсгэн байгуулагдсан. Японы Чиба аймгийн Мацүдо хотноо байрладаг. Азийн бусад орнуудаас Япон улсад суралцаж байгаа оюутнууд энэхүү тэтгэлэгт өрсөлдөж, жилд шинээр 100 гаруй оюутан тэтгэлэг авдаг. Япон дахь тэтгэлгийн тухайд, сургалтын төлбөр, амьдрах зардлыг бүрэн олгодог буцалтгүй тэтгэлэг бөгөөд уг сангаас тэтгэлэг авсан 80 гаруй Монгол оюутан бий.