С.САРУУЛ

БНХАУ-ын Засгийн газрын буцалтгүй тусламжаар олгож буй 2.8 тэрбум төгрөгийн өртөг бүхий ой, хээрийн түймэр унтраах зургаан автомашин, зөөврийн усан шахуурга, үлээгч аппарат, үүргийн гал унтраагуур, хүрз гэх мэт 10 орчим төрлийн 2400 гаруй ширхэг техник, багаж хэрэгслийг онцгой байдлын албанд хүлээлгэн өглөө. Энэ үеэр Шадар сайд У.Хүрэлсүх, БНХАУ-аас Монгол Улсад суугаа Онц бөгөөд бүрэн эрхт Элчин сайд ноён Шин Хай Мин нар буцалтгүй тусламжаар олгож буй ой, хээрийн түймэр унтраах  автомашин, техник тоног төхөөрөмж, багаж хэрэгслийг хүлээн авах баримт бичигт гарын үсэг зурсан юм. Энэ оны эхний найман сарын байдлаар улсын хэмжээнд 3194 удаагийн аюулт үзэгдэл, осол тохиолдож 161 хүн нас барсан. Онцгой байдлын албаны албан хаагчид  545 хүний амь насыг авран хамгаалжээ. Ой, хээрийн түймэр унтраах туулах чадвар бүхий 21 тонны усны багтаамжтай,  гал унтраах орчин үеийн эдгээр автомашиныг Багануур,  Баянхонгор, Дорнод, Сүхбаатар, Төв, Хэнтий аймгийн Онцгой байдлын газарт хүлээлгэн өгч байгаа юм. Харин дагалдах зөөврийн усан шахуурга, үлээгч аппарат, үүргийн гал унтраагуур, хүрз гэх мэт 10 орчим төрлийн 2400 гаруй багаж хэрэгслийг төв, орон нутгийн Онцгой байдлын анги байгууллагуудад хуваарилжээ.

Эх сурвалж: www.polit.mn