Ц.БАЯР

Эрүүл мэндийн салбарын ажилтнууд 30 сартай тэнцэх мөнгөн тэтгэмжийг 12 сар хүртэл  бууруулах саналыг эсэргүүцэн гарын үсэг цуглуулж байгаа бөгөөд Засгийн газар, УИХ, Сангийн яам, Эрүүл мэндийн яаманд тэтгэмжийн хэмжээг бууруулахгүй гэсэн албан шаардлагыг хүргүүлж байгааг өнөөдөр /09.08/ МҮЭХ-ны байранд болсон  хэвлэлийн хурлын үеэр хэллээ. Хэрвээ энэ шаардлагыг хэрэгжүүлэхгүй бол дараагийн шатны тэмцлийн арга хэмжээнд шилжинэ гэдгээ мэдэгдлээ. Тэд “Өнөөдөр сарын 30 сая төгрөгийн цалин авч байгаа төрийн өндөр албан тушаалтнууд, төрийн өмчит компаниудын захирлуудын цалинг танаж чадахгүй байж хамгийн бага цалинтай эмч, эмнэлгийн ажилтнуудынхаа халаас руу гар дүрж байна ” гэв. Мөн  төсвийн тодотголоо эргэж харахгүй бол олон жил эрүүл мэндийн салбарт ажилласан ахмад, эмч, ялангуяа нарийн мэргэжлийн эмч, сувилгаа үйлчилгээ үзүүлдэг сувилагч нар эрүүл мэндийн салбарт тогтохгүй. Одоо сумын эмнэлэг, өрхийн эмнэлэгт хүний нөөцийн маш их хомсдолтой байгаа. Сүрьеэ, халдварт, гэмтлийн эмч гээд нарийн мэргэжлийн эмч нар маш их дутагдалтай байна. Дутагдалтай мэргэжилтнүүдийг татахын тулд нийгмийн хамгааллын бодлогыг Хөдөлмөрийн яам, Эрүүл мэндийн яамтай удаа дараа зөвшилцөж, өндөр насны тэтгэвэрт гарахад олгодог тэтгэмжийг бууруулахгүй гэдгээ хэлсэн. Үүнийгээ хэрэгжүүлээч" гэлээ.

Эх сурвалж:www.zms.mn