Х.ЦОЛМОНЗАЯА

“Хаан банк”, ХСҮТ, МҮОНТ-ээс хамтран зохион байгуулж буй “Хавдрын эсрэг үндэсний аян-2016” арга хэмжээний нээлт өнөөдөр Ховд аймагт боллоо. Өдгөө зургаа дахь жилдээ зохион байгуулагдаж буй тус аяны хүрээнд хорт хавдраас урьдчилан сэргийлэх мэдээлэл зөвлөмж, сургалт сурталчилгааг олон нийтэд хүргэхээс гадна нарийн мэргэжлийн тусламж үйлчилгээг ард иргэдэд ойртуулсан өргөн цар хүрээтэй үйл ажиллагаа явагдах юм.

“Хавдрын эсрэг үндэсний аян-2016” аяны нээлтэд Ховд аймгийн Засаг даргын орлогч Ш.Батсүх, “Хаан” банкны Ховд салбарын захирал Ч.Төрбат, БОЭТ-ийн захирал Т.Баяртогтох нар үг хэллээ. Нээлтэд Ховд аймгийн БОЭТ-ийн эмч, ажиллагсад, ХААН банкны ажилтнууд болон аймгийн иргэдийн төлөөлөл өргөнөөр оролцсон байна. Энэхүү аяны нээлтийн ажиллагаа болон аяны талаарх мэдээллийг аймгийн “Ховд”, “Жаргалант” телевизээр шууд дамжуулан иргэдэд хүргэлээ. Ховд аймагт энэ сарын 5-наас 9-ний өдрүүдэд үргэлжлэх аяны хүрээнд хавдрын нарийн мэргэжлийн эмч нарын үзлэг, шинжилгээ хийгдэхээс гадна Ховд, Баян-Өлгий, Увс аймгийн эмч нарыг хамарсан бүсчилсэн сургалт, Ховд аймгийн эмч, сувилагч нарт болон эрүүл мэндийн сайн дурын идэвхитэнд зориулсан сургалт зохион байгуулна.

Эх сурвалж: www.polit.mn