С.УЯНГА

Хөвсгөл аймгийн Хатгал тосгонд 6-15 насны дөрвөн хүүхэд, 26 настай залуу усанд осолдсон харамсалтай хэрэг гарсан билээ. Иргэдэд сэрэмжлүүлэх үүднээс Зам тээврийн хөгжлийн яамны  Далайн захиргааны мэргэжилтэн Г.Золбоогоос тодрууллаа.

-Хөвсгөлд харамсалтай хэрэг гарчээ. Усанд оёолдсон хүмүүс ямар зорилготой явсан юм бэ?

-Наймдугаар сарын 30-нд Хөвсгөл нууранд усан замын тээврийн осол гарч таван хүний амь үрэгдсэн харамсалтай хэрэг гарсан. Зорчигчид болон завь жолоодож явсан иргэн аврах хантааз өмсөөгүй байсан. Мөн завь жолоодож явсан хүн зорчигч тээврийн бус загас агнуурын шугамаар загасны тор тавьж байгаад амиа алдсан байсан. Хэрэг гарсан өдрийн 17:00 цагийн үед ослын байршлыг тогтоож Хөвсгөл аймгийн онцгой байдлын албатай хамтран иргэдийн цогцсыг гаргах ажлыг эхлүүлсэн.

-Осолдсон завь бүрт­гэл­тэй байсан уу. Ер нь Хөвсгөл нууранд хэдэн завь зөвшөөрөлтэй үйл ажил­лагаа явуулж байна вэ?

-Шинэчилсэн бүрт­гэлээр Монгол Улсад 98 усан замын тээврийн хэрэгсэл байдаг. Үүнээс 78 тээврийн хэрэгсэл Хөвсгөл нууранд бүртгэлтэй байгаа.  Осолдсон завь нь Зам тээвэр болон Байгаль орчин ногоон хөгжлийн сайдын 2014 оны хамтарсан тушаалын дагуу усан замын тээврийн бүртгэл, улсын дугаар олгох журмын дагуу бүртгүүлээгүй байсан. Ослын маргааш 15 настай хүүхдийн цогцос болон осол гаргасан усан замын тээврийн хэрэгслийг уснаас гаргаж цагдаагийн байгууллагад шилжүүлж өгсөн.

-Танай байгууллагаас иргэдийн аюулгүй байдлыг хангах үүднээс ямар ажил хийдэг вэ?

-Зам тээвэр хөгжлийн яамны харъяа Далайн захиргаанаас иргэдийн аюулгүй байдлыг хангах, тээврийн хэрэгслийн бүртгэлийг шинэчлэх ажлыг жил бүр хийдэг. Завьчдын ур чадварыг шалгах сургалт хийж, онцгой байдлын байгууллагын усчин аврагчидтай хамтарч зургадугаар сарын 25-наас хойш хоёр сарын хугацаанд завьт эргүүл ажиллуулдаг.

-Бүртгэлтгүй тээврийн хэрэгсэл ашиглавал ямар хариуцлага тооцох вэ?

-Усан замын тээврийн тухай хуульд хариуцлагын тодорхой заалт байхгүй. Тиймээс Захиргааны хариуцлагын хуулиар зохицуулагддаг. Гэхдээ завины эзэн ямар зорилгоор жолоо шилжүүлсэн гэдэгт шат шатандаа хариуцлага тооцно. Цаашид иргэд, холбогдох газрынхан хяналтаа сайжруулах ажлыг хийнэ. Завин дээр явсан иргэд аврах хантаазтай, завины жолоодогч анхан шатны тусламж үзүүлдэг байх ёстой.

Эх сурвалж: “Зууны мэдээ” сонин