Т.САЙХАН

Монголын жүдо бөхийн холбооны Удирдах зөвлөлийн нээлттэй хурал /08.27/ болж өнгөрлөө. Хурлаар “Рио-2016” олимпийн тайлан, “Чингис Хаан Гран При Улаанбаатар-2016” тэмцээний тайланг хэлэлцсэнээс гадна Монголын жүдо бөхийн холбооны Их хурлын товыг зарлан улмаар зохион байгуулах хороог байгуулсан байна. Мөн МЖБХ-ны Ерөнхийлөгч Х.Баттулгыг Улсын баатар цолонд тодорхойлохоор Удирдах зөвлөлийнхөн санал нэгджээ. Жүдо бөхийн Үндэсний шигшээ багийн ахлах дасгалжуулагч Одвогийн Балжинням 2011-2016 оны хооронд жүдо бөхийн Үндэсний шигшээ багийн ахлах дасгалжуулагчаар ажиллаж олимпийн хоёр мөнгө, нэг хүрэл, дэлхийн хоёр аварга, нэг мөнгө, гурван хүрэл медальтнуудыг төрүүлсэн амжилтаар Хөдөлмөрийн баатар цолонд тодорхойлохоор болжээ. "Рио-2016" олимпийн наадмын мөнгөн медальт гавьяат тамирчин Доржсүрэнгийн Сумъяаг Монголын эмэгтэй жүдочдоос анхлан олимпийн мөнгөн медаль хүртсэн, ДАШТ-ий хүрэл, дэлхийн шилдгүүдийн тулаан "World Masters" тэмцээнд гурав дараалан түрүүлсэн анхны жүдоч, "Их дуулга", Гран При ангилалын тэмцээний найман алт, дөрвөн мөнгө, гурван хүрэл медалийн амжилтаар нь Хөдөлмөрийн баатар цолд тодорхойлохоор боллоо. Үндэсний шигшээ багийн жүдо бөхийн дасгалжуулагч гавьяат тамирчин Д.Баттулга /ДАШТ-ий анхны хүрэл медальт/ болон "Москва-1980" олимпийн хүрэл медальт Равдангийн Даваадалай нарыг Ардын багш цолд тодорхойлохоор болжээ. Д.Сумъяагийн багш гавьяат тамирчин Х.Эрдэнэт-Од, анхны багш Чиёондоржийн Базарсүрэн /пара жүдо бөхийн шигшээ багийн дасгалжуулагч/ нарыг Монгол Улсын гавьяат дасгалжуулагчаар шагнуулах хүсэлтийг Удирдах зөвлөлийнхөн гаргасан байна.

Эх сурвалж:www.polit.mn