Ч.ЗОТОЛ 

Өндөр албан тушаалтнуудын цалинг танах ажлын хүрээнд Төрийн өмчийн компаниудын захирлын урамшууллыг ашигт ажиллагаа, гэрээний үр дүнгийн биелэлттэй хянадаг болгохыг Ерөнхий сайд үүрэг болгожээ.

2016 оны улсын төсвийн байдлыг харвал  төрийн өмчийн болон төрийн өмчийн оролцоотой аж ахуйн нэгжүүд төсөвт 28 тэрбум төгрөг төвлөрүүлэх ёстой аж. Гэтэл оны эхний долоон сарын байдлаар ердөө 79 сая төгрөг төвлөрүүлжээ. Ажиллаж байгаа байдал нь ийм атал  авдаг цалин нь өөр. Тухайлбал, төрийн өмчийн болон төрийн өмчийн оролцоотой аж ахуйн нэгжийн захирлуудын цалин хамгийн бага нь л гэхэд 3.5 саяас эхэлдэг нь нууц биш. Дээд тал нь 10 сая төгрөг авдаг гэж  байгаа. Уулын баяжуулах “Эрдэнэт” үйлдвэрийн  орлогч дарга л  гэхэд сард  10 мянган еврогийн цалин авч  улирал тутам 60 мянган еврогийн урамшуулал авдаг байна.

Тэгвэл энэ удаа өөрчлөлт хийхээр болсон нь төрийн өмчийн компанийн удирдлагуудын цалинг 30-60 хувь бууруулах Засгийн газрын шийдвэр юм.  Ингэснээр төрийн өмчит болон төрийн өмчийн оролцоотой хуулийн этгээдийн гүйцэтгэх захирал болон бусад удирдлагын цалин хөлс, урамшууллын хэмжээг өөрчлөн тогтоож, нэг сарын цалин хөлс нь 5-10 сая төгрөг бол 30 хувь, 10-30 сая төгрөг бол 50 хувь, 30 сая төгрөгөөс дээш бол 60 хувь бууруулахаар болж байна. Дээр нь  эдгээр албан тушаалтны урамшууллыг олгохдоо үр дүнгийн гэрээний биелэлттэй сайтар уях, байр орон сууцны нөхцөл сайжруулах, нэг удаагийн буцалтгүй тусламж зэрэг бусад их хэмжээний мөнгөн шагнал бүхий нэмэлт хангамж олгохыг зогсоожээ. Мөн энэ шийдвэртэй холбогдуулан цалин, урамшуулал, гадаад дотоод томилолт, тавилга эд хогшил худалдан авах зэрэг одоо зарцуулагдаагүй байгаа зардлуудыг улсын төсөвт татаж авахаар болсон байна. Цаашид төрийн өмчит болон төрийн өмчийн оролцоотой аж ахуйн нэгжүүдийн удирдлагын цалин, урамшууллыг ТУЗ-ийн төвшинд шинэчлэхийг Ерөнхий сайдаас үүрэг болгожээ.

Эх сурвалж: www.polit.mn