Д.ЧИМЭГ

Хүнс, хөдөө аж ахуй, хөнгөн үйлдвэрийн сайд П.Сэргэлэн Бүгд Найрамдах Солонгос Улсаас Монгол улсад суугаа Онц бөгөөд бүрэн эрхт Элчин сайд У Сун-г хүлээн авч уулзлаа.

Талууд уулзалтын эхэнд хоёр орны найрамдалт харилцаа сүүлийн жилүүдэд улам өргөжин хөгжиж Төрийн тэргүүн нарын харилцан айлчлал идэвхижиж хүнс, хөдөө аж ахуй, хөнгөн үйлдвэрийн салбар дахь хамтын ажиллагаа хөгжиж байгаад сэтгэл хангалуун байгаагаа илэрхийлэв.

Сайд П.Сэргэлэн хоёр орны Хөдөө аж ахуйн яам хоорондын хамтын ажиллагаа идэвхитэй байгааг онцлон тэмдэглээд сүүлийн жилүүдэд Солонгосын хөгжлийн хамтын ажиллагааны байгууллагуудын шугамаар Монголын мал аж ахуй, газар тариалан, мал эмнэлэгийн салбарын чадавхыг бэхжүүлэхэд чиглэсэн төсөл, хөтөлбөрүүдийг амжилттай хэрэгжсэнд талархал илэрхийлэн цаашид үргэлжлүүлэх, цар хүрээг нь тэлэхийг хүсэв. 

Тэрээр шинээр эмхлэгдэн байгуулагдсан Монгол Улсын Засгийн газар, Хүнс, хөдөө аж ахуй, хөнгөн үйлдвэрийн яам Монголын нийт ард иргэдийг баталгаатай хүнсээр хангах чиглэлээр хүнсний аюулгүй байдалд ихээхэн анхаарч ажиллахаар төлөвлөөд байгааг дуулгаад Монголын хүнсний салбарт Солонгосын дэвшилтэд техник, технологийг нэвтрүүлж хамтран ажиллах хүсэлтийг тавив.

Элчин сайд ноён У Сун тавьсан саналуудыг нааштай хүлээн авч идэвхитэй хамтран ажиллахаа илэрхийлэв. Тэрээр Солонгосын аж үйлдвэржсэн туршлага, Солонгосын “Шинэ тосгон” хөтөлбөрийг Монголд нэвтрүүлж турших хүсэлтийг уламжлаад хөрөнгө оруулах сонирхол бүхий Солонгосын аж ахуйн нэгжүүд нэмэгдэж байгааг дуулгав. 

Сайд П.Сэргэлэн Монгол Улсын мал эмнэлэгийн чадавхи төдийлөн сайн биш, ялангуяа хурдны морийг эмчлэх мэдлэг хомс байгааг хэлээд энэ чиглэлээр дагнасан мал эмнэлэг байгуулах хүсэлтэй байгаагаа Элчин сайдад дуулгав. Элчин сайд энэ саналыг сонирхон хүлээн авч өөрийн орны холбогдох байгууллагуудад нь уламжлан хамтран ажиллах боломжыг судлахаа амлалаа.

Эх сурвалж: www.polit.mn