Т.САЙХАН

Өчигдөр /08.10/ эрэгтэйчүүдийн 90 кг, эмэгтэйчүүдийн 70 кг-ын жингийн барилдаан болж, медальтнууд тодорсон. Эрэгтэйчүүдийн 90 кг-д өрсөлдсөн Л.Отгонбаатар хүрэл медалийн төлөө Хятадын Чэн Жаотой барилдан юүко үнэлгээгээр ялагдан шагналт тавдугаар байрыг эзлэв. Л.Отгонбаатар Нидерландын Нёл Ван Т Энди, олимпийн мөнгөн, дэлхийн аваргын алт, хүрэл медальт Кубын Эшли Гонзалесыг ялснаар шөвгийн наймд үлдсэн юм. Хагас шигшээд үлдэх эрхийн барилдаанд Гүржийн В.Липартелианд дийлдсэн ч дагах барилдаанд Азарбайжаны бөх М.Мамадалийг юүко үнэлгээгээр ялснаар хүрлийн төлөө барилдахаар шалгарсан. Медалийн төлөөх шийдвэрлэх барилдаанд БНХАУ-ын Чэн Жаод дийлдэн шагналт тавдугаар байрыг эзэллээ. "Рио 2016" наадмын жүдо бөхийн төрлөөс Хятадын баг анхны медалиа хүртлээ.Эмэгтэй 70 кг-д 24 тамирчин өрсөлдсөнөөс Ц.Наранжаргал "А" хэсэгт багтсан. Манай тамирчин эхний тойрогт Гүржийн Эстер Стамд вазари үнэлгээ алдан тэмцээнээ өндөрлүүллээ.

Эх сурвалж:www.polit.mn