С.САРУУЛ

Энэ сарын 6-7-ны өдрүүдэд Хүй долоо худагт болсон “Даншиг наадам-Хүрээ цам 2016” шашин соёлын наадмын үеэр худалдаачид их хэмжээний хохирол амссан талаараа хэвлэлийнхэнд хандсан юм. Наадмын үеэр НЗДТГ-ын Хүнс худалдаа үйлчилгээний хэлтсээс 200-аад иргэн, аж ахуй нэгжид худалдаа эрхлэх зөвшөөрөл олгосон ч наадмын талбайгаас 2-3 км зайтай байсан учраас ямар ч ашиг олоогүй байна. Энэ талаар  “Төгсжаргал” хөгжлийн бэрхшээлтэй иргэдийн ТББ-ын тэргүүн Э.Долгорсүрэн “Зөвшөөрлийн үнэ 10 мянган төгрөг. Дээр нь тус бүр 10 мянган төгрөгийн үнэтэй цамц, фудволк 3 ширхийг хүчээр өгсөн. Хуушуурын наймаа эрхлэгч гэхэд туслах ажилтан болон тогоочийн цалин,  тээвэрлэлтийн 100 мянган төгрөгийн зардал зэргээс хамааран багадаа хоёр сая төгрөгийн зардал гаргасан. Гэвч хоёр өдрийн турш наймаа эрхлэн 200- 350 мянган төгрөгийн орлого олж ямар ч ашиггүй ажилласан. 17-20 мянган төгрөгийн орлого олсон хүн ч байгаа. Тиймээс бид нэгдэж байгаад Хотын захирагч С.Батболдод хохирол барагдуулах нэхэмжлэл өнөөдөр өгч байгаа. “Монгол наадам цогцолбор” ОНӨТҮГазрын ашиглалтын инженер Ж.Нямхүү цүнх дүүрэн зөвшөөрөл зараад явж байсан гэсэн. Нийслэлийн захирагчын ажлын албаныхан зохион байгуулалтаа хийж чадсангүй” гэсэн юм.

Худалдаа эрхлэгчдийн хэлж байгаагаар хамгийн гол нь гар дээрээс худалдаа эрхлэгчдийг хяналттай байлгаж, наадмын зөвшөөрлөө талбайд ойрхон олгох ёстой байсан аж. Тэдний саналыг хүлээж авахгүй бол жагсч, өлсгөлөн зарлахад ч бэлэн байгаа гэв.

Эх сурвалж: www.polit.mn