Б.БАРС

Байт сурын харвааны ОХУ-ын эмэгтэйчүүдийн шигшээ баг хоёр буриад бүсгүйтэй. Нэг нь Читийн 20 настай Туяна Дашидоржиева, нөгөө нь 26-тай Буриадын Инна Степанова.  Олимпийн чансаа тогтоох урьдчилсан харваандТуяна Дашидоржиева амжилттай оролцон БНСУ-ын хүчирхэг гурвал болон Тайванийн харваачийн ард айргийн тавд багтжээ. Тэрээр хасагдах шатанд энэ сарын 9-нд Бутаны Карматай цэц мэргээ сорино. Харин урьдчилсан харваанд 16-д орсон Инна Степанова Ираны Захра Нематитай оноолт таарсан аж. Тэгвэл багийн тэмцээний урьдчилсан харваанд буриад бүсгүйчүүд болон Екатеринбургийн Ксения Перовагийн бүрэлдэхүүнтэй ОХУ-ын шигшээ БНСУ-ын ард хоёрт орон шууд шөвгийн наймд шалгарчээ. Өнөөдөр тэд Энэтхэг, Колумбын аль хожсонтой өрсөлдөх ба хожвол хагас шигшээд медалийн төлөө харвах юм. 20 настай Т.Дашидоржиева 11 насандаа байт сурын харваагаар хичээллэж эхэлсэн бөгөөд ердөө жилийн дараа ОХУ-ын спортын мастерын цолын болзол хангаж, арвандөрөвхөн настайдаа ОХУ-ын аварга болж байжээ. Харин Е.Степанова ганцаарчилсан харваанд Европын мөнгө, хүрэл медаль хүртэж байсан аж.

Эх сурвалж: www.polit.mn