Т.ДАЛАЙ

Чингисийн талбайд анх удаа 350 уран нугараач оролцсон “Уул усны домог” тоглолтыг зохион байгуулах гэж байна. Энэхүү тоглолтыг Гиннесийн амжилтад бүртгүүлэх гэж байгаа бөгөөд Монголын нэрийг олон улсад уран нугаралтаар гаргахын тулд  350 гэсэн тоог авчээ. Учир нь энэ тоо зөвхөн Монголд л боломжтой бөгөөд манай улсад л хамгийн олон нугараач бэлтгэгддэг юм байна.

Уран нугараачдын багийг Төрийн шагналт, Ардын Жүжигчин, уран нугараач Б.Норовсамбуу ахалж, бэлтгэл хийлгэжээ. "Уул усны домог" тоглолтод дэлхийд алдартай Нарны циркийн шоунд оролцож байгаа олон улсад гялалзаж байгаа уран нугаралтын одод оролцоно. АНУ-ын Лас Вегаст тоглогдож байгаа шоуны дасгалжуулагч багш Монголын анхны хос нугараачдын нэг, "Монте Карло"-оос  хамгийн анхны шагналыг эх орондоо авчирсан Ж.Эрдэнэчимэг, 1990 онд Парис хотоос Тагтаатай нугаралтаар мөнгөн медаль авчирч байсан  Ундармаа, одоо АНУ-д ажиллаж амьдарч байгаа нугараач Н.Тунгалаг нар оролцох юм. Тоглолт Дарь эхүүд, ус, цэцэгс, могойн чуулган, Алунгоо хатан гэсэн  хэсгүүдээс бүрдэж байгаа.  Үндэсний болон орчин цагийн аястай бүжиг хөгжмөөр чимэглэсэн уг тоглолт нийт 01.30 минут үргэлжилнэ. Энэхүү тоглолтын ерөнхий найруулагчаар нийслэлийн Улаанбаатар чуулгын дарга, МУСТА Р.Мөнхсайхан ажиллаж байна.

Эх сурвалж:www.polit.mn