Т.САЙХАН

 Хүй мандлын торгон дэвжээнээ Даншигийн наадам эхэллээ. Жуулчдыг татах зорилготойгоор өнгөрсөн жилээс эхлэн 100 гаруй жилийн түүхтэй даншиг наадмыг сэргээн тэмдэглэхээр болсон билээ.  “Даншиг наадам хүрээ цам” шашин соёлын наадам өнөөдөр /08.06/ 11.00 цагт нээлтээ хийсэн юм.  Нээлтэд нийслэлийн Засаг дарга С.Батболд, Гандантэгчинлэн хийдийн хамба лам Д.Чойжамц болон лам хуварга сүсэгтэн олон оролцлоо.  Энэ үеэр Нийслэлийн Засаг дарга С.Батболд “Анх Өндөр Гэгээн Занабазарын өргөө нэрээр байгуулсан Улаанбаатар маань өдөр ирэх бүр цэцэглэн хөгжиж байна. Бид  түүхээ марталгүй,  шашин соёлын наадмаа тэмдэглэх нь олон ач холбогдолтой юм.  Дэлхийн олон орны хүмүүст шашин соёлоо танилцуулж байна.  Эргээд манайд оронд ирэх хүмүүсийн тоо нэмэгдэж байна” гэлээ.   Ийнхүү Нийслэлийн Засаг дарга С.Батболд наадмыг нээснээр шашны зан үйл эхэлсэн юм.  Өндөр гэгээн Занабазарын Соёмбот тугийг наадмын талбайн хойморьт мандуулав. Мөн Өндөр гэгээний дүрийг залж, Очирваань шүтээний тахилга боллоо.  500 лам хуварга сүсэгтэн олонд зориулан ном хурж манал өргөв.  Ийнхүү Хүй долоон худагийн торгон ногоон дэвжээг лам хуваргууд “эзлэн” номын буянаа түгээв.  Одоо хүчит бөхийн барилдаанаар  энэ жилийн даншиг наадам үргэлжилж байна.

Эх сурвалж:www.polit.mn