Т.БАТСАЙХАН

Өнөөдөр /08.05/ 13.30 цагийн үед МАХН-ын дарга Н.Энхбаярын өрөөнд Авлигатай Тэмцэх газрын 10 гаруй хүн хүч төрөн орж, байцаалт өгөхийг шаардлаа. Тэд өрөөг нь дотроос нь түгжин, намын нөхөдийг нь оруулахгүй нэг цаг орчим байсан юм.  УИХ-ын гишүүн асан З.Баянсэлэнгэ, Шадар сайд асан Ц.Оюунбаатар, Н.Энхбаярын хүү Э.Батшугар нарын хүмүүс өрөөнд орох хүсэлтэй байгаагаа илэрхийлж байсан ч АТГ-ынхан оруулсангүй.  “Бид ажлаа л хийж байна” гэсэн тайлбартайгаар өрөөнд орох гэсэн хүмүүсийг түрхэн, эмх замбараагүй байдал үүсгэж байв.  МАХН-ын байрны үүдэнд АТГ-ын 20 гаруй хүн ирсэн байв.  МАХН-ын дарга Н.Энхбаярыг өрөөнд цаг гаруй түгжсэний эцэст АТГ-ын 10 гаруй хүн гарсан. Энэ үеэр Н.Энхбаяр тайлбар өглөө.  Тэрээр “АТГ дайрсан түрэмгийлсэн хүний эрхийг уландаа гишгэсэн хэвээр байна. Өнөөдөр /08.05/ Хуримын ордон ачаалалтай байлаа. Мөн хэвлэлийнхэн байгаа учраас намайг баривчлах бохир ажиллагаагаа хийж чадсангүй.  Миний өрөөнд байсан хүмүүс утсаар байн байн “Орж болохгүй байна уу” гээд л яриад байсан.  Удахгүй шөнө оройн цагаар намайг баривчлахаар ирэх биз.  Магадгүй ийм олон камерын өмнө би сүүлийн удаа яриа өгч байж мэднэ.  Гэхдээ би айхгүй” гэсэн юм.  Энэ удаа АТГ-ынхан  ЭМС-ын сайд асан Г.Шийлэгдамба болон МАХН-ын төв байр, мөн өмгөөлөгчтөй холбоотой асуудлаар баривлан байцаалт авахаар ирснийг мөн тэрээр хэлж байсан.  Н.Энхбаяр “Г.Шийлэгдамбын өгсөн мэдүүлэг дээр үндэслэн надад ял тулгаж байна. Яагаад намын нэг хүн асуудалд ороход би хариуцлагыг нь хүлээх ёстой юм. Би Г.Шийлэгдамбаас нэг ч төгрөг авч үзээгүй. Тэр 50 мянган ам.доллар надад ямар ч хамаагүй. Мөн энэ намыг байрыг залилсан гэж хэлж байна. Миний нэг ч гарын үсэг байхгүй.  Ийм нотлох баримтгүй зүйлүүд дээр үндэслэн миний эрхэнд халдаж байна” гэж байв.

Эх сурвалж:www.polit.mn