Ц.БАЯР

Өнөөдөр /07.29 нд/ түр зуурын бороо орно. Чухам аль дүүргээр илүүтэй орох төлөвтэй байгааг  цаг уурынхан гаргаагүй байна. Цаашид 29-ний өдөр түр зуурын бороо орж, 30-ны өдрөөс өдөртөө 31-35 хэм хүртэл халах урьдчилсан төлөвтэй байна.  Өчигдөр  буюу 2016  оны 07 дугаар сарын 28-ны өдрийн 19:55 цагаас 20:30 цаг хүртэл Улаанбаатар хотод орсон түр зуурын хүчтэй аадар борооны улмаас хотын зүүн хэсэг буюу Баянзүрх дүүрэг бүхэлдээ, Сүхбаатар, Чингэлтэй, Баянгол дүүргийн хойд хэсэг их хэмжээний усанд автаж, ялангуяа Баянзүрх дүүргийн З-р хороо Чингис зочид буудлын зүүн талын автозам 300м, Бөхийн өргөөний урд талын хороолол дундах автозам 250м, Нарны гүүрний зүүн талын автозам 150м, “Буян” компаний зүүн талын автозамуудад ус ихээр нэмэгдсэний улмаас иргэдийн автомашин усанд суух, хөвөх, мөн орц болон газар доорхи давхаруудад ус их орж автомашинууд усанд автсан зэрэг хүндрэлтэй нөхцөл байдал үүссэн. Харин  бусад дүүргүүд болон Улиастай хавиар дусал ч бороо ороогүй тухай оршин суугчид нь ярьж байна.  Тэгэхээр өнөөдөр орох бороо үерийн зэрэгт хүрэх үү, үгүй юу гэдэгт цаг уурынхан хариулж мэдэхгүй байна. Нийслэл хотод болсон үерийн аюулын хор уршгийг арилгах зорилгоор нийслэлийн Онцгой байдлын газрын Аврах анги, Баянзүрх, Баянгол, Сүхбаатар, Сонгинохайрхан, Хан-Уул, Чингэлтэй дүүргийн Онцгой байдлын хэлтсийн Гал унтраах аврах ангиудын бэлтгэл ээлжийн бүрэлдэхүүнийг 20:45 цагт “Яаралтай цуглар“ дохио өгч цуглуулан бэлэн байдлыг ханган ажилласан.

Эх сурвалж:www.polit.mn