Г.ГАНЧИМЭГ 

Монгол Улсад стандартчлалын салбар үүсч хөгжөөд бүхэл бүтэн жарныг үджээ. Гэвч өнгөрсөн хугацаанд олон улсын чанар, стандартын зөвлөх үйлчилгээ төдийлөн сайн хөгжөөгүй, хууль эрх зүйн орчин ч тодорхойгүй байсаар ирсэн юм. Харин саяхнаас олон улсын стандартын ууган байгууллага болох олон улсын стандартыг /ISO/ үүсгэн байгуулагч Их Британийн Стандартын байгууллага /BSI/ нь Монголын менежментийн зөвлөхүүдийн холбоог өөрийн хөтөлбөртөө хүлээн авч, олон улсын стандартын зөвлөх үйлчилгээг үзүүлэх эрхийг олгожээ. Өөрөөр хэлбэл, олон улсын стандартад нийцсэн ISO чанарын стандартын зөвлөх үйлчилгээ Монгол Улсад Монголын менежментийн зөвлөхүүдийн холбооноос л албан ёсоор авна гэсэн үг. Энэ тухайгаа өнөөдөр тус холбооны Удирдах зөвлөлийн гишүүд Үндэсний мэдээллийн төвд хэвлэлийн бага хурал зарлаж мэдэгдлээ.

Монголын менежментийн зөвлөхүүдийн холбооны Удирдах зөвлөлийн дарга Г.Билгүүн “Олон улсын стандартад нийцсэн 30-40 мянга гаруй стандарт бий. Эдгээрээс манай улсад түгээмэл хэрэглэгддэг нь чанарын удирдлагын тогтолцооны ISO 9001, байгаль орчны удирдлагын тогтолцооны ISO 14001 зэрэг стандартыг дурдаж болно. Энэхүү олон улсын стандартад нийцсэн ISO чанарын стандартын зөвлөх мэргэжлийн байгууллага, зөвлөхүүд өнөөдөр манай улсад дутмаг байгаа. Тэднийг бид бэлтгэх юм. Олон улсын стандартад нийцсэн сургалтад хамруулж, баталгаажуулснаар гэрчилгээ, хувийн дугаар олгоно. Ийм зөвлөхүүд л олон улсад хүлээн зөвшөөрөгдөж, зөвлөгөө өгөх эрхтэй болно” гэв.

Монголын менежментийн зөвлөхүүдийн холбоо нь 2008 онд байгуулагджээ. Манай улс зах зээлийн эдийн засагт шилжсэнээр менежментийн зөвлөх үйлчилгээ зайлшгүй шаардлагатай болсон. Энэ хугацаанд жижиг дунд болон томоохон бизнесийн төслүүдэд менежмент, хүний нөөц, санхүүгийн чиглэлээр зөвлөх үйлчилгээг үзүүлж ирсэн туршлагатай тус холбоонд бий аж.

Эх сурвалж: www.polit.mn