Б.Уранзаяа

Унгар улсын иргэн, мотоцикльтой аялагч Габор Паеир манай улсад түр саатаад байна.  Түүнтэй ярилцлаа.

-Манай оронд ирсэн сэтгэгдлээ хуваалцахгүй юу. Аяллаа хэзээнээс эхэлсэн бэ?

-Аяллаа эхлээд нэлээдгүй хугацаа өнгөрлөө. Тавдугаар сарын 27-нд эх орноосоо гарсан. Харин Монголын нутагт хөл тавиад найм хонож байна. Баруун хилээр орж ирсэн.  

-Яагаад мотоцикльтой аялахаар болсон юм бэ?

-Би өөрөө оффисын ажил эрхэлдэг хүн. Байнга сууж ажилладаг учир цонхоор харах болгондоо гадуур гарч, аялж зугаалахыг их хүсдэг байлаа.  Хоёр жилийн өмнөөс Эрвин Котецки гэх дунд сургуулийн найзтайгаа аялалд бэлтгэж эхэлсэн.

- Зүгээр онгоцоор аялах нь амар биш үү?

-Мотоцикльтой аялснаараа аливаа улс орны өнцөг булан болгон руу явж болно. Ерөнхийдөө аяллын маршрутаа өөрөө гартаа авч байгаа юм. Хэрэв онгоцоор аялах байсан бол онгоцны нисгэгч миний аяллыг хаашаа явж яахыг шийднэ шүү дээ.

-Одоогийн байдлаар хэдэн орноор аялаад байгаа вэ?

- 16 орноор аялах ба одоогоор 13 орноор аялсан байна. Мөн би найзтайгаа аялж байсан боловч тэр маань бэртэл авсны улмаас эх орон руугаа буцсан.

-Та аяллынхаа үр дүнг хэрхэн харж байна вэ. Өдрийн тэмдэглэл хөтөлдөг үү?

-Би тухайн өдөрт болсон үйл явдлын зураг болон видеогоо өөрийн сайтдаа байршуулдаг /www.HUNomad.hu/.

-Хамгийн их сэтгэгдэл үлдээж чадсан ямар орон байв?

-Тажикстан, Туркменстан болон Монгол орон байлаа. Яагаад гэвэл ард иргэд нь их найрсаг санагдсан. Мөн Монгол орны өргөн уудам тал нутаг,  нүүдэлчин амьдралын хэв маяг их сайхан санагдсан.

-Энэ аяллыг зохион байгуулахад хүмүүс хэрхэн хүлээн авч байв?

-Манай найз бид хоёр аяллаа эхлүүлэх гээд мотоцикль авахаар явж байтал худалдаачид биднийг “ Энэ санаагаа та хоёр маргааш гэхэд мартах болно оо” гэж үл ойшоож байсан. Гэвч бид зориг шулуудсан байсан юм. Бидэнд байгууллага гэхээсээ илүү хувь хүмүүс тусалж, урам зориг өгч аялалдаа зориулаарай гэж мөнгө хандивлаж байсан.

Эх сурвалж:www.polit.mn