Б.ЗАЯА

НИТХ-аас баталсан “Найрсаг Улаанбаатар” хөтөлбөрийн хүрээнд  урлаг, спорт, олон нийтийн арга хэмжээг зохион байгуулж байхаар  шийдвэрлэсэн билээ.  Энэ жилийн Үндэсний их баяр наадмын үеэр жуулчдад зориулан Монголын сонгодог урлагийн ноён оргил “Учиртай гурван толгой” дуурь, “Улаанбаатарын үдэш” рок поп оддын шоу тоглолт, Талын бүжиг” Монгол туургатны бүжгийн их наадам, Морин хуурын фестивал зэрэг томоохон соёл, урлагийн арга хэмжээг Чингис хааны нэрэмжит талбайд зохион байгуулсан юм.

Харин ирэх сарын 6, 7-ны өдрүүдэд  “Даншиг наадам-Хүрээ цам" шашин соёлын наадмыг зохион байгуулах бөгөөд энэ өдрүүдэд “Уул усны домог” уран нугараачдын үзүүлбэрийг толилуулна. Энэхүү үзүүлбэрт орон нутгаас болон нийслэлийн дүүргүүдээс шалгарсан 350 уран нугараач, шилдэг багш нар оролцож  Монголын уран нугралтыг Геннисийн номонд бүртгүүлэхээр зорьж байгаа юм байна. 

Дэлхийд гайхагддаг монголын уран нугараачдын шилдэг үзүүлбэрийг ирэх сарын 6-нд Чингис хааны нэрэмжит талбайд сонирхоорой.

Эх сурвалж: polit.mn