Б.ЭНХ

Увс аймагт Монголын үндэсний бөхийн холбооны эсрэг гарын үсэг цуглуулах ажил ид өрнөж байна. Өнгөрсөн баяр наадмаар үндэсний бөхийн барилдаанд улсын арслан П.Бүрэнтөгс, улсын арслан Р.Пүрэвдагва нарын барилдааны шүүлт олон нийтийн эсэргүүцэлтэй тулсан билээ. Хөлийн цэцүүд нэг цаг гаруй маргалдаж шийдвэрээ гаргасан ч үнэнд нийцээгүй гэдгийг бөхчүүд, бөх сонирхогчид ам нэгтэй хэлж буй. Хамгийн наад зах нь камерын тусламжтайгаар шүүгээгүй, жалга довны үзэл гаргасан гэж олон хүн хэлж Үндэсний бөхийн холбоо шинэчлэгдэхийг шаардаж байгаа.

Тэгвэл яг энэ асуудлаар Увс аймагт гарын үсэг цуглуулах ажил эхэлжээ. Бөх сонирхогч хэсэг залуус нэгдэж аймгийн төвд болон сумуудаар гарын үсэг цуглуулж байгаа аж. Тэд бөхчүүд, залуучуудын хөдөлмөр, зүтгэлийг үнэлдэг бөхийн холбоо болох шаардлагыг тавьж буй юм. Цуглуулсан гарын үсгээ МҮБХ болон УИХ-ын Өргөдөлийн байнгын хороонд удахгүй хүргүүлэхээр зэхэж байна. Энэ ажиллагааг Увс аймгийн хэмжээнд маш идэвхтэй дэмжиж байгаа аж. Зөвхөн Увс гэлтгүй орон даяар дэмжих нь гарцаагүй.

Эх сурвалж: www.polit.mn