Б.УРАНЗАЯА

Энэ жилийн наадмыг өнгөлсөн “Алдар” спорт хорооны тамирчдыг Батлан хамгаалахын сайд Ц.Цолмон хүлээн авч, баяр хүргэлээ. Энэ үеэр Улсын аварга Ч.Санжаадамбатай цөөн хором ярилцлаа.

-Энэ жилийн наадмын тухай яриа хараахан намжаагүй байна. Таны амжилтаар бахархсан ард олонтойгоо сэтгэгдлээ хуваалцахгүй юу?

-13 жилийн өмнө “Алдар” спорт хорооноос Г.Өсөхбаяр ах маань Улсын наадамд түрүүлж байлаа. Мөн 1985 онд  “Алдар” спорт хорооноос хоёр бөх үзүүр түрүүнд үлдэж байсан.   Улсын арслан Ганбаатар  түрүүлж, Хадбаатар аварга үзүүрлэж байлаа. 31 жилийн өмнөх энэ түүх давтагдлаа.  Сайхан байна.

-Өнөөдөр /07.18/ Зэвсэгт хүчний удирдлагууд та бүхнийг хүлээн авч байна. Удирдлагын зүгээс ихэд баяртай байх шиг байна?

-Бэлтгэл сургуулилт хийхэд “Алдар” спортын хороо, Зэвсэгт хүчний Жанжин штаб, Батлан хамгаалах яамнаас сайн тусалж дэмждэг. Тэр ч утгаараа энэ жилийн наадамд манай бөхчүүд маань олон сайхан амжилт үзүүллээ. Удирлагууддаа бүгдэнд нь баярлаж талархсанаа илэрхийлж цаашдаа улам илүү хичээж барилдах болно гэдгээ хэлмээр байна.

-Наадмын дараахан нутгаадаа явсан сураг байсан. Нутгийн зон олон сайхан хүлээж авсан уу?

-Тийм ээ. Би Архангай аймгийн Хашаат сумын хүн.  Сумандаа очиж ах дүү ард олондоо золгоод ирсэн. Удахгүй аймгийн маань баяр наадам болно. Тэнд очиж оролцохоор бэлдээд байна.

Эх сурвалж:www.polit.mn