Б.ЭНХ
Баяр наадмын өдрүүдээр Баянхонгор аймгийн Баацагаан сум, Дархан-Уул аймгийн Орхон сум, Дорнод аймгийн Халхгол сум, Завхан аймгийн Алдархаан сум, Сэлэнгэ аймгийн Мандал, Сүхбаатар сум, Төв аймгийн Лүн сум, Ховд аймгийн Булган сум, нийслэлийн Баянзүрх, Налайх, Хан-Уул дүүрэгт усны ослоор 17 иргэн амь насаа алджээ. Тэдний долоо нь хүүхэд байсан байна. Онцгой байдлын албаны албан хаагчид цогцсыг гаргаж цагдаагийн байгууллагад шилжүүлсэн байна. Энэ сарын 14-нд Сэлэнгэ аймгийн Сүхбаатар суманд Орхон голд гурван иргэн согтуугаар эргүүлэгтэй усанд унасныг Онцгой байдлын газрын албан хаагчид шуурхай ажиллан иргэдийн амь насыг аварчээ. Мөн Баянзүрх дүүргийн 20 дугаар хороо, Харгиа амралтын газар болон тус дүүргийн 85 дугаар сургуулийн дэргэд Туул голд хүн живж байна гэсэн гэсэн дуудлагаар Нийслэлийн Аврах ангийн албан хаагчид, ажиллаж, хоёр иргэний амь насыг аварсан байна. 

Иймд, иргэд аялал, амралт зугаалгаар явахдаа гол усны ойролцоо амарч зугаалахгүй, сонор сэрэмжтэй байж, бага насны хүүхдийг гол усны эрэг дагуу явуулж, тоглуулахгүй байх, хүүхдэд тавих хараа хяналтаа дээшлүүлэх, баталгаатай гүүр, гарам, гарцтай газраар автомашинтай зорчиж, аюулгүй байдлаа хангахыг Онцгой байдлын ерөнхий газраас онцгойлон анхааруулж байна.

Эх сурвалж: www.polit.mn