Б.ЭНХ

Баян-Өлгий аймгийн Өлгий сумын нутагт энэ сарын 10-ны өдөр 17:00-17:30 цагийн хооронд хүчтэй аадар бороо, мөндөр үргэлжлэн орсны улмаас үер болж онцгой нөхцөл байдал үүссэн билээ. Үерийн улмаас дөрвөн настай хүү амиа алдаж, Өлгий сумын таван багийн нутаг дэвсгэрт 160 гаруй айл өртөж, 105 байшин нурсан мэдээллийг эхний байдлаар албаныхан гаргаад байсан. Тэгвэл сүүлийн байдлын хохирлын хэмжээ ямар байгааг тус аймгийн Онцгой байдлын газрын дарга, хурандаа Ц.Баттулгатай холбогдож дараах мэдээллийг авсан юм. Үерийн улмаас хохирлын хэмжээ өнгөрсөн бямба гариг гэхэд айлын хашаа, байшин нурах тохиолдол нэмэгдсээр 110 гаруйд хүрч, орон гэргүй болсон хүмүүсийн тоо 1250-д хүрчээ. Байгалийн гэнэтийн аюулаас болж хүүхэд, хөгшид эмнэлгийн анхан шатны тусламж авч байгаа гэнэ. Хүний амь нас хохирсон тохиолдол нэмэгдээгүй, мал амьтны хохирол байхгүй гэв. Өчигдрийн байдлаар Өлгий сумын хэмжээнд халдваргүйжилтын ажлыг зохион байгуулж, Засгийн газраас илгээсэн тусламжийн цувааг хүлээж авах бэлтгэл хангаж байгааг мэдээлэв.

Эх сурвалж: www.polit.mn