Д.ГЭРЭЛ

Ерөнхий сайд Ж.Эрдэнэбатын урилгаар БНХАУ-ын Төрийн зөвлөлийн Ерөнхий сайд Ли Көцян энэ өдрүүдэд Монгол Улсад албан ёсны айлчлал хийж байна. 

Засгийн газрын тэргүүн Ж.Эрдэнэбат зочноо ёслол хүндэтгэлтэйгээр угтан авч, Их эзэн Чингис хааны хөшөөнд хүндэтгэл үзүүлснээр БНХАУ-ын Төрийн зөвлөлийн Ерөнхий сайдын айлчлал албан ёсоор эхэллээ. 

БНХАУ-ын Төрийн зөвлөлийн Ерөнхий сайд Ли Көцян  хүндэт зочны дэвтэрт гарын үсэг зурсны дараагаар хоёр орны Ерөнхий сайд нар ганцаарчилсан уулзалт хийсэн юм. БНХАУ-ын Төрийн зөвлөлийн Ерөнхий сайд Ли Көцяны айлчлал хоёр орны Иж бүрэн стратегийн түншлэлийн харилцааг гүнзгийрүүлэн хөгжүүлэх, дээд төвшний харилцан айлчлалын давтамжийг хадгалах, эдийн засгийн бодит хамтын ажиллагааг урагшлуулах, шинэ агуулга хэлбэрээр баяжуулан хөгжүүлэхэд чухал ач холбогдолтой.

Мөн энэ айлчлал нь БНХАУ-ын Төрийн зөвлөлийн Ерөнхий сайдын зургаан жилийн дараа Монгол Улсад хийж буй айлчлал болж байгаа юм. Ерөнхий сайд Ж.Эрдэнэбат БНХАУ-ын Төрийн зөвлөлийн Ерөнхий сайд Ли Көцянтай албан ёсны хэлэлцээ хийж, хоёр улсын харилцаа, хамтын ажиллагаа болон олон улс, бүс нутгийн харилцан сонирхсон олон асуудлаар санал солилцов. Албан ёсны хэлэлцээний дараа талууд худалдаа, эдийн засаг, дэд бүтэц, санхүү, эрчим хүч зэрэг олон салбарын хамтын ажиллагааг хөгжүүлэхэд чиглэсэн 10 гаруй баримт бичигт гарын үсэг зурлаа.

Хоёр талын хамтын ажиллагааны баримт бичигт гарын үзэг зурлаа

Айлчлалын хамгийн гол хэсэг болох хоёр талын хамтын ажиллагааны баримт бичигт гарын үсэг зурах ёслолын арга хэмжээнд Ерөнхий сайд Ж.Эрдэнэбат, БНХАУ-ын Ерөнхий сайд Ли Көцян нар оролцлоо. Уг арга хэмжээний үеэр:

-Хоёр улсын Гадаад хэргийн яамд хоорондын 2017-2018 оны хамтын ажиллагааны төлөвлөгөө 
-Эдийн засаг, техникийн хамтын ажиллагааны тухай хоёр улсын Засгийн газар хоорондын хэлэлцээр 
-Монгол Улсын Засгийн газрын өрийг чөлөөлөх тухай хоёр улсын Засгийн газар хоорондын протокол 
-БНХАУ-ын Засгийн газраас 2014 онд олгосон 300 сая юанийн буцалтгүй тусламжийн хөрөнгөөр хэрэгжүүлэх төслийн хүрээнд гурван сургуулийн төслийг эхлүүлэх тухай солилцох захидал 
-Уур амьсгалын өөрчлөлттэй тэмцэх эд материал бэлэглэх тухай Монгол Улсын Сангийн яам, БНХАУ-ын Үндэсний хөгжил, шинэчлэлийн хороо хоорондын санамж бичиг 
-Монгол Улсын Гааль, татварын ерөнхий газар, БНХАУ-ын Гаалийн ерөнхий газар хоорондын стратеги, хамтын ажиллагааны төлөвлөгөө 
-БНХАУ-ын Засгийн газрын 500 сая ам.долларын хөнгөлттэй зээлийн хөрөнгөөр хэрэгжүүлэх төслийн хүрээнд Баянхонгор – Байдрагийн гүүрний 129 км авто замын төслийн тусгайлсан зээлийн хэлэлцээр 
-БНХАУ-ын Засгийн газрын 500 сая ам.долларын хөнгөлттэй зээлийн хөрөнгөөр хэрэгжүүлэх төслийн хүрээнд Тосон цэнгэл – Улиастайн 114 км авто замын төслийн тусгайлсан зээлийн хэлэлцээр 
-БНХАУ-ын Засгийн газрын 500 сая ам.долларын хөнгөлттэй зээлийн хөрөнгөөр хэрэгжүүлэх “Улаанбаатар – Хөшигийн хөндийн шинэ нисэх онгоцны буудлын хурдны автозам барих” төслийн хяналт, зөвлөх үйлчилгээний гэрээ
-Монгол Улсын Хөгжлийн банк, БНХАУ-ын ЭКСИМ банк хооронд Улаанбаатар хотын долдугаар хорооллын “G” хэсгийн орон сууцны төслийн санхүүжилтийн гэрээ, 
Монгол Улсын Худалдаа хөгжлийн банк, БНХАУ-ын Хөгжлийн банк хоорондын зээлийн гэрээ 
-МҮОНРТ, Хятадын олон улсын радио хоорондын хамтын ажиллагааны гэрээ, 
МҮОНРТ, Хятадын төв телевиз хоорондын хамтын ажиллагааны гэрээ 
-Монгол Улсын Хөрөнгө оруулалтын газар, БНХАУ-ын Экспортын зээлийн даатгалын компани хоорондын хамтын ажиллагааны санамж бичиг 
-Улаанбаатар-Мандалговь цахилгаан дамжуулах агаарын шугам, дэд станц барих төслийн барилгын ажлын гэрээг ёсчлох тухай баримт бичиг зэрэг 15 баримт бичгийг байгуулав.

Эх сурвалж: Polit.mn