Т.САЙХАН

Манай улсаас хамгийн олон цэрэг энхийг сахиулах ажиллагаанд үүрэг гүйцэтгэж буй Өмнөд Судан улсын нийслэл Жуба хотод тулалдаан болжээ.  "Динка" омгоос гаралтай Ерөнхийлөгч Салва Кийр болон "Ниур" омгоос гаралтай дэд Ерөнхийлөгч Риек Мачар хоёрын хоорондох улс төр, омог хоорондын зөрчлийн улмаас ийнхүү мөргөлдөөн болсон байна. Долдугаар сарын 7-ны өдөр Жуба хотын төвд замын хаалтад зогсож байсан засгийн газрын таван цэрэг амь үрэгдсэн байна.  Цагийн байдал хүндэрч, мөргөлдөөн улам даамжирсаар тав  хоног үргэлжлээд өчигдрөөс (07.12)  арай намжиж байна.   Талууд нисдэг тэрэг, танк, их буу, миномёт, том калибрын пулемёт зэрэг хүнд зэвсэглэл ашигласан тул хохирол их гарчээ. Одоо ирж байгаа мэдээгээр бол тулалдаанаас болж хоёр талаас 300 гаруй цэргүүд болон энгийн иргэд амь үрэгдэж, олон зуун мянган хүн орон гэрээсээ дайжин дүрвэсэн байна. Мөн Жуба хотод буй НҮБ-ын төв байр луу халдлага үйлдсэний улмаас найман хүн амь үрэгдэж, 67 хүн шархтсаны дотор БНХАУ-ын хоёр энхийг сахиулагч амь үрэгджээ.  Тус улсад үүссэн нөхцөл байдалтай холбоотой НҮБ-ын Аюулгүйн Зөвлөл яаралтай хаалттай хуралдсан ба уг хэрэг явдлыг буруушааж, талуудыг өөрсдийн цэргээ хяналтад оруулж яаралтай гал зогсоохийг уриалсан юм.

Эх сурвалж:www.polit.mn