Д.ГЭРЭЛ

АСЕМ-ын Дээд түвшний уулзалтын дагалдах хурлуудын хамгийн сүүлийнх болох Ази-Европын бизнесийн чуулган өнөөдөр 2016.07.14  Төрийн ордонд нээлтээ хийлээ. 40 гаруй орны бизнесийн төлөөлөл оролцож буй уг уулзалтын зохион байгуулалтын ажлын хэсгийн ахлагчаар Аж үйлдвэрийн сайд Д.Эрдэнэбат ажиллаж байгаа бол Монголын үндэсний худалдаа аж үйлдвэрийн танхим, “Монголын эдийн засгийн форум”, “Монголын ажил олгогчдын эздийн холбоо” зэрэг байгууллага хамтран зохион байгуулж байна.

Ази-Европын бизнесийн 15 дугаар чуулганыг Ерөнхий сайд Ж.Эрдэнэбат нээсэн юм. Тэрээр "АСЕМ-ын 20 жилийн ойн босгон дээр гадаадын болон дотоодын томоохон хөрөнгө оруулагчид, хувийн хэвшлийн манлайлагч нартай уулзаж байгаадаа баяртай байна. Энэ уулзалтад 43 орны 700 гаруй зочид, төлөөлөгч санал бодлоо солилцохоор ирээд байна. Манай улс хоёр том улсын дунд оршдог, тэр хэрээрээ худалдаа наймаа дамжин өнгөрөх таатай бололцоог бүрдүүлдэг. Тиймээс манай улс бизнесийг дэмжсэн таатай нөхцлийг бүрдүүлэхэд анхаарч ажиллана" гэдгээ онцоллоо.

Хоёр өдөр үргэжлэх бизнесийнхний чуулган нь “Оролцоотой эдийн засгийг хөгжүүлэх”, “Ази-Европын уялдаа холбоо”, “Жижиг, дунд бизнес олон улсын нэмүү өртгийн сүлжээнд нэгдэх”, “Хөрөнгө оруулалт ба ногоон хөгжил” гэсэн сэдвийн хүрээнд хэлэлцүүлгүүд өрнүүлнэ.

Энэ удаагийн бизнесийнхний уулзалтыг Монголын бизнесмэнүүдэд хөрөнгө оруулалт татах томоохон боломж олгоно хэмээн салбарын хүмүүс үзэж байгаа юм.

Мөн энэ үеэр олон улсын хөрөнгө оруулагчид, бизнесийнхэн бараа бүтээгдэхүүнээ үнэгүй сурталчлах боломжтойгоороо онцлог болж байгаа аж.  

Эх сурвалж: Polit.mn