Д.ГЭРЭЛ

Бүгд Найрамдах Социалист Вьетнам улсын Ерөнхий сайд Нгуен Суан Фук-ийн Монгол Улс дахь албан ёсны айлчлал өнөөдөр /2016.07.14/ эхэлж байна. Ерөнхий сайд Ж.Эрдэнэбат гэргийн хамт БНСВУ-ын Ерөнхий сайд Нгуен Суан Фук, гэргий Тран Нгуен Ту нарыг эзэн Чингисийн талбайд угтан авч, хүндэтгэл үзүүллээ. Угтан авах ёслолд Засгийн газрын Хэрэг эрхлэх газрын дарга С.Баяцогт, Гадаад хэргийн сайд Л.Пүрэвсүрэн, Уул уурхайн сайд Р.Жигжид болон Бүгд Найрамдах Социалист Вьетнам улсаас Монгол Улсад суугаа Онц бөгөөд Бүрэн эрхт Элчин сайд Фан Данг Дыөнг нарын албаны хүмүүс оролцов.

Түүнийг угтан авсны дараа БНСВУ-ын Ерөнхий сайд Нгуен Суан Фук Төрийн ордны Баганат танхимд зочлон хүндэт зочны дэвтэрт гарын үсэг зурж, дурсгалын зураг татуулсан юм.

Монгол Улс, Вьетнам улстай дипломат харилцаа тогтоогоод 62 жил болж буй. Энэ хугацаанд хоёр улсын нийгэм, эдийн засгийн шилжилтийн байдлаас шалтгаалан Монгол, Вьетнамын харилцаа хэсэгтээ идэвхгүй байсан ч сүүлийн жилүүдэд эдийн засаг, худалдаа, аялал жуулчлалын салбарт эрчимтэй хамтрах болсон. Ийм үед БНСВУ-ын Ерөнхий сайд Нгуен Суан Фук Монгол Улсад айлчилж байгаа нь хамтын ажиллагаанд ач холбогдолтойг хоёр тал онцолж байгаа.

Ерөнхий сайд Ж.Эрдэнэбат БНСВУ-ын Ерөнхий сайд Нгуен Суан Фук нар Төрийн ордонд ганцаарчилсан уулзалт хийж байна. Хоёр улсын Ерөнхий сайд уулзалтынхаа дараа албан ёсны хэлэлцээ хийж, баримт бичиг зурах юм.

Тэрээр айлчлалынхаа үеэр Ерөнхийлөгч Ц.Элбэгдоржид бараалхаж, УИХ-ын дарга М.Энхболдтой хоёр улсын харилцаа, хамтын ажиллагааны талаар санал солилцоно.

Мөн энэ өдрүүдэд Ерөнхий сайд Нгуен Суан Фук Монгол-Вьетнамын бизнес форум, АСЕМ-ын Дээд түвшний 11 дэх удаагийн уулзалтад оролцож, Монголд сурч, ажиллаж байгаа Вьетнам иргэдтэй уулзахаар төлөвлөсөн байна.

Эх сурвалж: Polit.mn